Timor-Leste prepara vizita Prínsipe Alberto II hosi Mónaku no Primeiru-Ministru na’in-haat husi Pasífiku
Iha loron 13 fulan-outubru tinan 2026, iha Palásiu Prezidensiál Nicolau Lobato, Dili, Prezidente Repúblika, José Ramos-Horta, konvoka no prezide reuniaun koordenasaun interinstitusionál ida hodi halo preparasaun ba vizita husi lider internasionál na’in lima ne’ebé prevee ba fulan-novembru no komemorasaun aniversáriu Proklamasaun Independénsia nian ba da-51, iha loron 28 fulan-novembru. 
Partisipa iha sorumutu ne’e, membrus Governu, reprezentantes hosi entidade governu sira no responsavel husi instituisaun sira ne’ebé envolve iha organizasaun ba komemorasaun no vizita ofisiál sira, ne’ebé inklui área negósius estranjeirus, defeza, interiór, administrasaun estatál, finansas, no mós petróleu no rekursus minerais, nune’e mós forsas defeza no seguransa, Banku Sentrál Timor-Leste (BCTL, sigla iha lian portugés) no entidade nasionál sira seluk.
Iha fulan-novembru, Timor-Leste sei simu Prínsipe Alberto II husi Mónaku, ne’ebé prevee sei to’o mai iha loron 24, Primeiru-Ministru sira husi Fiji, Sitiveni Rabuka, Papua-Nova Giné, James Marape, Vanuatu, Jotham Napat, no Illas Salomão, Matthew Wale. Lider na’in-lima ne’e sei partisipa iha komemorasaun Proklamasaun Independénsia nian, iha loron 28 fulan-novembru.
Sorumutu ne’e ho objetivu atu koordena preparativu institusionál, lojístiku, protokolár no seguransa ne’ebé relasiona ho vizita no komemorasaun ne’e. Komisaun organizadora nasionál simu ona orientasaun atu aselera serbisu entre instituisaun oioin ne’ebé envolve.
Partisipasaun lider sira husi Pasífiku iha komemorasaun loron 28 fulan-novembru hanesan parte ida atu hametin relasoins Timor-Leste nian ho país sira iha rejiaun ne’e no sei sai oportunidade atu afirma lasu amizade no solidariedade, nune’e mós rekorda país sira-ne’e nia kontribuisaun ba dame no estabilidade iha Timor-Leste, inklui liuhusi partisipasaun misaun internasionál iha país ne’e.
Entre tema sira ne’ebé prevee ba vizita ne’e maka dezenvolvimentu sustentavel no protesaun ba oseanu, iha ámbitu relasaun bilaterál ho Mónaku. Jestaun Fundu Petrolíferu Timor-Leste nian tenke tama mós iha ajenda enkontru ho lider sira husi país sira Pasífiku nian.
Instituisaun sira ne’ebé envolve sei kontinua halo koordenasaun kona-ba preparasaun ba vizita internasionál no komemorasaun aniversáriu Proklamasaun Independénsia nian ba da-51.
