Plaka komemorativa iha Darwin marka tinan 50 kona-ba xegada refujiadu timoroan dahuluk iha Austrália
Vise-Ministra Negósius Estranjeirus no Kooperasaun, Jesuína Maria Ferreira Gomes, akompaña husi Ministra Komérsiu, Negósius no Relasoins ho Ázia Governu Territóriu Norte nian, Robyn Cahill, no membru komunidade timoroan sira iha Austrália, iha loron 15 fulan-outubru tinan 2026, iha Darwin, partisipa iha serimónia inaugurasaun ba plaka komemorativa ida ne’ebé marka aniversáriu ba da-50 kona-ba xegada refujiadu timoroan dahuluk iha sidade australiana, iha fulan-agostu tinan 1975. 
Plaka ne’e instala iha Stokes Hill Wharf, fatin ne’ebé asosiadu ho xegada refujiadu sira husi Timor liuhosi tasi. Plaka refere sai rejistu permanente ida husi epizódiu ida-ne’e kona-ba istória hamutuk entre Timor-Leste no Austrália no mós fó omenajen ba ema sira ne’ebé husik-hela territóriu Timor tanba konflitu no instabilidade polítika iha tinan 1975.
Plaka ne’e fó-hanoin katak, iha fulan-agostu iha tinan ne’ebá, iha refujiadu liu rihun rua husi Timor to’o iha Stokes Hill Wharf, ho ró kargeiru Mac Dili e Lloyd Bakke, hafoin husik-hela territóriu ne’e tanba konflitu.
Instalasaun plaka komemorativa iha Stokes Hill Wharf ne’e fó sai ona iha tinan 2025 husi deputadu federál australianu Luke Gosling, iha ámbitu inisiativa ne’ebé ho objetivu atu marka aniversáriu ba da-50 kona-ba xegada dahuluk hosi refujiadu sira no prezerva memória hosi períodu istóriku ida-ne’e.
Iha ninia intervensaun durante serimónia ne’e, Vise-Ministra Jesuína Maria Ferreira Gomes agradese ba povu australianu no, liuliu ba autoridade sira Territóriu Norte nian, ba apoiu no asisténsia ne’ebé fó ba refujiadu sira ne’ebé to’o iha Darwin iha fulan-agostu tinan 1975. Vise-Ministra mós hanoin-hikas solidariedade no akollimentu ne’ebé populasaun australiana hatudu ona iha tempu difisil ba istória Timor-Leste nian.
Serimónia iha Darwin ne’e hanesan parte ida hosi inisiativa komemorativa sira ne’ebé marka tinan 50 kona-ba xegada refujiadu timoroan dahuluk iha Austrália, ne’ebé halibur reprezentante sira husi país rua-ne’e no mós membru komunidade timoroan sira ne’ebé hela iha Austrália hodi prezerva memória istórika ida-ne’e.
