Governu Timor-Leste

Iha loron 13 fulan-outubru tinan 2026, iha Dili, Governu, liuhusi Sekretaria Estadu  Komunikasaun Sosiál, partisipa iha entrega formál fatin atu hahú hikas konstrusaun edifísiu foun ba Rádiu no Televizaun Timor-Leste (RTTL, EP), projetu  ne’ebé finansia husi Governu Japaun no implementa iha parseria ho Programa Nasoins Unidas nian ba Dezenvolvimentu (PNUD). 

Serimónia ne’e hetan partisipasaun husi Sekretáriu Estadu Komunikasaun Sosiál, Expedito Dias Ximenes, Prezidente Konsellu Administrasaun RTTL, EP, Rosario da Graça Maia, no Konselleiru  Estratéjiku PNUD, Alberto Lizzi.

Konstrusaun ne’e tenke hahú fali  iha fulan-outubru, ho prazu ezekusaun fulan 15 no konkluzaun ne'ebé planeia ona ba fulan-dezembru tinan 2027.

Projetu foun ba sede  RTTL nian lansa iha tinan 2023, iha ámbitu husi akordu ida entre Governu Japaun no PNUD, ho finansiamentu ida maizumenus dolar amerikanu millaun neen ne'ebé aloka hodi hadi'a infraestrutura sira no reforsa kapasidade operasionál sira hosi estasaun públika rádiu no televizaun nian.

Fatuk dahuluk husi edifísiu foun ne'e lansa iha fulan-dezembru tinan 2024. Tuirmai konstrusaun paradu no projetu ne'e tenke hetan revizaun tanba kondisaun rai nian, ne'ebé presiza reformulasaun solusaun ne'ebé prevee ona iha inísiu no mós hala’o prosesu aprovizionamentu foun ida husi PUND.

Edifísiu ne’e sei mantein andár tolu no integra instalasaun foun sira ne’ebé sei utiliza ba atividade rádiu, televizaun no produsaun konteúdu nian, hodi fornese kondisaun ne’ebé di’ak liu ba RTTL atu hala’o ninia funsaun hanesan ​​servisu públiku komunikasaun sosiál nian. Aleinde konstrusaun, projetu ne’e inklui mós formasaun téknika  ba jornalista no profisionál RTTL sira seluk, ho objetivu atu reforsa ekipa nia kompeténsia hodi hatán ba ezijénsia komunikasaun ida ne’ebé moderna no efetiva.