Governu Timor-Leste

Primeiru-Ministru, Kay Rala Xanana Gusmão, iha loron 13 fulan-outubru tinan 2026, iha Palásiu Governu, Dili, simu karreta bombeiru lima ne’ebé fornese husi Governu Japaun ba Autoridade Protesaun Sivíl, ho objetivu atu hasa’e kapasidade ba kombate inséndiu no resposta ba situasaun emerjénsia sira iha Timor-Leste. 

Viatura hirak-ne’e entrega husi Embaixadór Japaun ba Timor-Leste, Yasushi Yamamoto, iha serimónia ida ne’ebé konta mós ho partisipasaun husi Sekretáriu Estadu Protesaun Sivíl, Domingos Mariano Reis, no mós reprezentantes husi Autoridade Protesaun Sivíl.

Apoiu ho valór dolar amerikanu 333 987 ne’e oferese liuhusi programa Japaun nian kona-ba Asisténsia Projetu Komunitáriu ba Seguransa Umana (Grant Assistance for Grassroots Human Security Projects – GGP). Viatura lima ne’ebé entrega ne’e, haat sei uza iha Dili no ida iha munisípiu Lautein.

Entrega ne’e konkretiza projetu reutilizasaun ba karreta bombeirus iha Dili no Lautein, ne’ebé formaliza ona iha fulan-fevereiru tinan 2025 entre Governu Japaun no Autoridade Protesaun Sivíl. Projetu ne’e prevee tipu veíkulu oioin hodi apoia operasaun kombate inséndiu no resposta emerjénsia sira.

Apoiu ne’e inklui mós formasaun loron lima ba bombeiru timoroan sira kona-ba operasaun, utilizasaun no manutensaun ba viatura sira, ho objetivu atu garante ninia utilizasaun ne’ebé adekuada no mós reforsa kapasidade operasionál husi ekipa resposta.

Durante serimónia ne’e, Embaixadór Yasushi Yamamoto destaka kooperasaun ne’ebé halo ona entre país rua ne’e no hato’o nia espetativa katak ekipamentu foun no mós formasaun ne’e bele kontribui hodi hasa’e kapasidade Timor-Leste nian ba kombate inséndiu no responde ba emerjénsia , nune’e mós ba protesaun ema no sasán sira.

Diplomata ne’e destaka mós importánsia hosi manutensaun regulár ba viatura sira hodi garante ninia operasionalidade no utilizasaun ba tempu naruk.

Primeiru-Ministru, Kay Rala Xanana Gusmão, lori Governu no povu Timor-Leste nia naran, agradese ba apoiu husi Governu no povu Japaun, no mós hanoin hikas kooperasaun ne’ebé Japaun fó ba país ne’e dezde 1999 iha área dezenvolvimentu oioin.

Dezde tinan 2000, programa GGP apoia ona projetu oioin ho impaktu diretu ba komunidade Timor-Leste, inklui konstrusaun no reabilitasaun eskola no mós unidade saúde, sistema abastesimentu bee no disponibilizasaun veíkulu no ekipamentu sira ba servisus públikus.

Tuir Embaixada Japaun katak, to’o tinan 2025 sira apoia ona projetu 148 liuhusi programa ida-ne’e, ne’ebé inklui munisípiu nasionál oioin no Rejiaun Administrativa Espesiál Oe-Kusi Ambenu.