Vise-Primeiru-Ministru destaka atividade voluntária no partisipasaun sívika foin-sa’e sira nian iha Konferénsia RYLA-TL 2026
Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, partisipa nu’udar oradór prinsipál iha abertura Konferénsia Rotary Youth Leadership Awards - Timor-Leste (RYLA-TL) 2026, ne’ebé hala’o iha Palásiu Nobre, Lahane, iha ne’ebé nia apela ba foin-sa’e sira atu hametin atividade voluntária, promove diálogu no kontribui ho ativu ba dezenvolvimentu nasionál. 
Iha nia intervensaun, Mariano Assanami Sabino destaka RYLA-TL nia kontribuisaun ba dezenvolvimentu kompeténsias lideransa entre foin-sa’e sira no promosaun valores hanesan responsabilidade, onestidade, respeitu mútuu no servisu ba komunidade.
Vise-Primeiru-Ministru salienta importánsia hosi atividade voluntária nu’udar dalan ida ba partisipasaun foin-sa’e sira nian iha sosiedade no motiva partisipante sira atu uza sira-nia koñesimentu no kapasidade hodi fó benefísiu ba sira ida-idak nia komunidade no país.
Mariano Assanami Sabino ko’alia mós importánsia husi diálogu no respeitu ba opiniaun diferente sira. Nia rekorda Timor-Leste nia lisaun sira iha pasadu no defende katak diverjénsia tenke rezolve liuhusi debate, kooperasaun no buka solusaun, ho respeitu nafatin ba prinsípius demokrátikus.
Iha kontestu ida-ne’e, nia apela ba partisipante sira atu hatene rona perspetiva oioin, fahe koñesimentu no mantein relasaun konstrutiva ho foin-sa’e sira ne’ebé mai husi organizasaun no setór sosiedade oioin, inklui sira ne’ebé partisipa iha partidus polítikus.
Konferénsia RYLA-TL halibur foin-sa’e sira ho perkursu no esperiénsia diferente ba atividade formasaun no interkámbiu ne’ebé ho objetivu atu dezenvolve kompeténsias lideransa, kria rede kontaktu no prepara inisiativa asaun sosiál iha komunidade sira.
RYLA-TL hala’o ona atividades formasaun ba foin-sa’e sira iha Timor-Leste dezde tinan 2010 no iha edisaun ida-idak ne’ebé hala’o, organizasaun ne’e integra ona formasaun lideransa ho partisipasaun iha atividade voluntária no servisu komunitáriu..
Bainhira hakotu ninia diskursu, Vise-Primeiru-Ministru enkoraja partisipante sira atu aplika koñesimentu ne’ebé sira hetan durante konferénsia iha sira-nia komunidade no mós atu mantein sira-nia envolvimentu iha inisiativa voluntária, diálogu, no partisipasaun sívika.
