Primeiru-Ministru ohin hahú programa ofisiál vizita ba Tailándia
Primeiru-Ministru, Kay Rala Xanana Gusmão, hahú, iha sexta-feira, 9 Outubru 2026, programa ofisiál ba nia vizita iha Tailándia, tuir konvite husi Primeiru-Ministru Tailándia, Anutin Charnvirakul, ho serimónia ofisiál boas-vindas iha Government House, iha Banguecoque, ne'ebé sei kontinua ho enkontru bilaterál entre Xefe Governu na'in-rua.
Ida-ne'e mak vizita ofisiál dahuluk ba Tailándia husi Primeiru-Ministru Timor-Leste ida dezde 2013, no mós dahuluk dezde Timor-Leste adere ba ASEAN, iha Outubru 2025. Vizita ne'e mós hala'o molok komemorasaun, iha 2027, ba aniversáriu ba dala 25 hosi estabelesimentu relasaun diplomátika entre nasaun rua.
Konversa entre Xefe Governu na'in-rua sei abranje kooperasaun ba dezenvolvimentu, defeza no seguransa, inklui kombate ba kriminalidade transnasionál, komérsiu no investimentu, seguransa ai-han, enerjia no turizmu, kontaktu entre povu sira no kooperasaun iha kuadru ASEAN.
Hafoin reuniaun bilaterál, Primeiru-Ministru na'in-rua sei sai testemuña ba troka akordu ida no partisipa iha konferénsia imprensa konjunta. Programa mós inklui almosu ofisiál ne'ebé Primeiru-Ministru Anutin Charnvirakul sei oferese hodi onra Primeiru-Ministru Xanana Gusmão no delegasaun timoroan.
Xefe Governu iha ona Tailándia dezde 4 Outubru, ne'ebé hala'o atividade oioin molok hahú programa ofisiál vizita nian.
Iha loron 6 no 7 Outubru, Primeiru-Ministru partisipa iha semináriu kona-ba jestaun prudente no sustentável ba Fundu Petrolíferu, ne'ebé halibur espesialista nasionál no internasionál sira husi área finanseira no investimentu, atu analiza sustentabilidade Fundu nian, estratéjia fiskál no investimentu, no dezafiu sira ne'ebé relasiona ho nia jestaun ba tempu naruk.
Iha 8 Outubru, Primeiru-Ministru hala'o reuniaun ho responsavel sira husi Thai Beverage Public Company Limited (ThaiBev) no TCC Group, ne'ebé hamutuk analiza oportunidade ba investimentu no kooperasaun ekonómika, inklui iha área produsaun lokál, turizmu, komérsiu retallu, imobiliáriu no lojístika.
Iha loron hanesan, Xanana Gusmão hasoru militár no ofisiál tailandés antigu sira ne'ebé partisipa iha misaun internasionál manutensaun dame iha Timor-Leste. Tailándia partisipa iha operasaun internasionál iha Timor-Leste hahú iha 1999 no integra grupu dahuluk nasaun sira ne'ebé estabelese relasaun diplomátika ho Timor-Leste, iha 2002.
Programa ofisiál vizita nian sei kontinua to'o 10 Outubru.
