Vise-Ministra Céu Brites hasoru malu ho nia omóloga hosi Portugál hodi ko’alia kona-ba polítika ema ho defisiénsia
Vise-Ministra Solidariedade Sosiál no Inkluzaun, Céu Brites, iha loron 2 fulan-outubru tinan 2026, iha Lizboa, hasoru malu ho Sekretária Estadu Asaun Sosiál no Inkluzaun Portugál nian, Clara Marques Mendes, hodi ko’alia kona-ba polítika no programa sira ne’ebé dedika ba ema sira ho defisiénsia. 
Durante sorumutu ne’e, governante na’in-rua ko’alia kona-ba apoiu ba moris independente no sistema dadus ne’ebé relasiona ho ema ho defisiénsia, no mós rekursus umanus ne’ebé presiza atu asegura akompañamentu ba ema sira ho defisiénsia.
Vise-Ministra Céu Brites destaka melloria sistema dadus no dezenvolvimentu rekursus umanus nu’udar área xave ba hametin polítika no servisu sira ne’ebé dedika ba ema ho defisiénsia.
Sekretária Estadu Clara Marques Mendes aprezenta esperiénsia Portugál nian kona-ba apoiu ba moris independente ema ho defisiénsia nian. Iha ámbitu ida-ne’e, Vise-Ministra fahe esperiénsia Timor-Leste nian liuhosi programa sira ne’ebé fó apoiu ba atividade ekonómika auto-sustentável, ne’ebé ho objetivu atu kontribui ba independénsia ekonómika ema ho defisiénsia nian.
Hafoin sorumutu ho Sekretáriu Estadu, Vise-Ministra no delegasaun timorense partisipa iha sorumutu tékniku ida ho ema ne’ebé iha responsabilidade iha área direitus ba ema sira ho defisiénsia hosi Portugál, iha ne’ebé durante sorumutu ne’e aprezenta programa sira ne’ebé dezenvolve iha Portugál ba protesaun direitu sira-ne’e.
Timor-Leste iha Planu Asaun Nasionál ba Ema ho Defisiénsia tinan 2021–2030, ne’ebé aprova liuhosi Rezolusaun Governu n. 7/2022, loron 1 fulan-marsu, ne’ebé estabelese kuadru nasionál atuasaun nian iha área ida-ne’e.
