Governu Timor-Leste

Ministru Agrikultura, Pekuária, Peskas no Florestas, Marcos da Cruz, partisipa iha Bali–Timor-Leste Business Forum 2026, ne’ebé hala’o iha Bali, Indonézia, iha loron 2 no 3 fulan-outubru 2026. Forun ne’e halibur reprezentante governu, emprezáriu, no investidór sira husi nasaun rua ne’e hodi promove oportunidade ba komérsiu, investimentu, no kooperasaun emprezariál. 

Ministru Marcos da Cruz reprezenta Vise-Primeiru-Ministru no Ministru Koordenadór Asuntus Ekonómikus, Francisco Kalbuadi Lay, iha abertura forun, ne’ebé hala’o ho tema “Liga oportunidade, harii prosperidade”. Eventu ne'e halo parte iha Bali International Business & Investment Forum 2026  no hetan partisipasaun hosi emprezáriu timoroan maizumenus na'in-60.

Programa ne’e inklui sesaun sira ne’ebé ko’alia kona-ba oportunidade kooperasaun iha área ekonomia azúl, ekonomia verde, turizmu, agrikultura, peskas, komérsiu, investimentu, konektividade, edukasaun, inovasaun, no dezenvolvimentu emprezariál.

Iha ninia diskursu, Marcos da Cruz destaka oportunidade sira ba kooperasaun ekonómika entre Timor-Leste no Indonézia no mós defende atu hametin relasaun entre setór privadu nasaun rua nian liuhosi investimentu, empreendedorizmu, transferénsia koñesimentu no teknolojia, inovasaun, no mós dezenvolvimentu rekursus umanus.

 “Relasaun ekonómika ida ne’ebé metin la depende de’it ba komérsiu, maibé mós ba investimentu, empreendedorizmu, koñesimentu, teknolojia, finansas, no inovasaun”, nia hateten.

Forun ne’e hamosu akordu kooperasaun tolu iha setór pekuária, akizisaun no modernizasaun ró, no mós edukasaun, inklui kooperasaun iha área ensinu, peskiza, no servisu komunitáriu.

Hanesan parte ida hosi programa ne’e, delegasaun Timor-Leste mós hala’o vizita téknika ba emprezas no atividades ekonómikas iha Bali, inklui sentru emprezariál ida iha Nusa Dua, atividade sira ne’ebé relasiona ho otelaria, unidade sira hakiak karau nian, no mós instalasaun ba produsaun no konstrusaun ró nian. Vizita sira ne’e nu’udar oportunidade ba sira hodi aprende kona-ba modelu jestaun, teknolojia, no esperiénsia emprezariál ne'ebé bele apoia inisiativa kooperasaun sira iha futuru.

Iha viajen ne’e, Marcos da Cruz hasoru malu ho Governadór Bali, Wayan Koster, no ko’alia kona-ba oportunidade ba kooperasaun iha setór turizmu, agrikultura, pekuária, peskas, no komérsiu. Parte sira mós diskute kona-ba esperiénsia Bali nian iha kriasaun no jestaun hakiak-karau, inklui posibilidade ba kooperasaun iha área ida-ne'e.

Ministru hala’o mós enkontru ho Prezidente Konsellu Ekonómiku Nasionál Indonézia nian, Luhut Binsar Pandjaitan, iha ne’ebé ko’alia kona-ba área agrikultura, edukasaun, dezenvolvimentu rekursus umanus, no teknolojia. Durante sorumutu, Prezidente ne’e hato’o vontade atu fahe esperiénsia no koñesimentu tékniku, ne’ebé inklui iha área transferénsia teknolojia no formasaun rekursus umanus.

Delegasaun husi Ministériu Agrikultura, Pekuária, Peskas no Florestas inklui Diretór-Jerál Peskas no Agrikultura, Acácio dos Santos, no mós Diretór Nasionál Irrigasaun, Jacinto Gama.

Bali–Timor-Leste Business Forum 2026  mós sai plataforma ida ba kontaktu diretu entre emprezáriu timoroan no emprezáriu indonéziu sira hodi identifika oportunidade ba parseria, investimentu, no komérsiu entre nasaun rua ne’e.