Timor-Leste no Universidade Brawijaya Indonézia reforsa kooperasaun iha área ensinu superiór no dezenvolvimentu rurál
Iha loron 4 no 5 fulan-outubru tinan 2026, Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, hala’o vizita ida ba Universidade Brawijaya, iha Malang, Java Leste, Indonézia, iha ne’ebé asina Memorandu Entendimentu rua ne’ebé ho objetivu atu reforsa kooperasaun ho Timor-Leste iha área ensinu superiór, siénsia, peskiza no dezenvolvimentu rurál. 
Akordu sira ne’e asina hosi Mariano Assanami Sabino, hanesan Ministru Dezenvolvimentu Rurál no Abitasaun Komunitária no Ministru interinu Ensinu Superiór, Siénsia no Kultura no hosi Reitór Universidade Brawijaya, Profesór Widodo.
Iha area ensinu superiór nian, Memorandu Entendimentu estabelese kuadru kooperasaun ida iha área ensinu, peskiza no servisu ba komunidade, ne'ebé inklui iha konseitu indonéziu Tri Dharma Perguruan Tinggi (Pilár Tolu Ensinu Superiór nian).
Kooperasaun ne’e ho objetivu atu kria oportunidade ba estudante no akadémiku timoroan sira, liuhosi bolsa estudu, mobilidade akadémika, programa diploma konjuntu no grau akadémiku duplu, no mós peskiza konjunta. Parte rua ne’e mós ko’alia kona-ba programa pós-graduasaun, mestradu no doutoramentu, no mós transferénsia koñesimentu.
Durante sorumutu ne’e, Mariano Assanami Sabino defende katak kompromisu sira ne’ebé prevee iha Memorandu ne’e tenke realiza iha programa no atividade konkreta sira, no mós propoin kriasaun ekipa téknika konjunta ida atu prepara kalendáriu ida no programa serbisu ida ne’ebé sai matadalan ba implementasaun área kooperasaun sira ne’ebé konkorda ona.
Asinatura ne’e fó kontinuidade ba kontaktu ne’ebé halo ona entre Governu no Universidade Brawijaya. Husi loron 23 to’o 25 fulan-abril tinan ida-ne’e, delegasaun ida husi universidade ne’e halo vizita ba Timor-Leste no hasoru malu ho Vise-Primeiru Ministru hodi ko’alia kona-ba oportunidade kooperasaun, ne’ebé inklui iha área agrikultura, formasaun rekursus umanus no dezenvolvimentu kadeia valór kafé nian.
Iha ámbitu husi oportunidade formasaun ne’ebé disponibiliza husi instituisaun Indonézia, Universidade Brawijaya rejista kandidatura hamutuk 42 husi estudante timoroan sira ba programa bolsu estudu, iha ne’ebé na’in-11 maka hetan ona selesaun.
Vizita ne’e inklui mós sorumutu ho estudante timoroan sira ne’ebé eskola iha Universidade Brawijaya no mós partisipasaun iha atividade akadémika iha universidade ne’e. Mariano Assanami Sabino nu’udar antigu alunu husi instituisaun ida-ne’e, iha ne’ebé nia hahú nia estudu iha área agrikultura iha 1991.
Kooperasaun ne’ebé estabelese durante vizita ne’e kobre mós dezenvolvimentu rurál no komunitáriu, liuhosi Memorandu Entendimentu ida entre Universidade Brawijaya no Ministériu Dezenvolvimentu Rurál no Abitasaun Komunitária, ne’ebé ho objetivu atu kria kuadru ida ba dezenvolvimentu inisiativa konjunta iha área ida ne’e.
Memorandu rua ne’e reforsa kuadru kooperasaun entre Timor-Leste no Universidade Brawijaya no mós estabelese baze ba dezenvolvimentu programa formasaun konjunta, peskiza, troka koñesimentu, no mós inisiativa sira ne’ebé relasiona ho dezenvolvimentu rurál no komunitáriu.
