Timor-Leste no Rúsia reforsa kooperasaun bilaterál durante vizita ofisiál Ministru Bendito Freitas ba Moskovu

Iha loron 6 fulan-outubru tinan 2026, iha Moskovu, Ministru Negósius Estranjeirus no Kooperasaun, Bendito dos Santos Freitas hasoru malu ho Ministru Negósius Estranjeirus Federasaun Rusa, Sergey Lavrov, iha ámbitu husi vizita ofisiál dahuluk Ministru Negósius Estranjeirus Timor-Leste nian ba Rúsia. 839693039 973015569173219 616909030822201013 n 300x211 Timor Leste no Rúsia reforsa kooperasaun bilaterál durante vizita ofisiál Ministru Bendito Freitas ba Moskovu 840288023 973013685840074 515895934671406840 n 300x211 Timor Leste no Rúsia reforsa kooperasaun bilaterál durante vizita ofisiál Ministru Bendito Freitas ba Moskovu 840419465 973015629173213 6247433166463834055 n 300x198 Timor Leste no Rúsia reforsa kooperasaun bilaterál durante vizita ofisiál Ministru Bendito Freitas ba Moskovu 840103360 973012972506812 3665031696398970103 n 300x219 Timor Leste no Rúsia reforsa kooperasaun bilaterál durante vizita ofisiál Ministru Bendito Freitas ba Moskovu

Sorumutu ne’e fó kontinuasaun ba diálogu polítiku entre país rua ne’e no mós enkontru entre Primeiru-Ministru, Kay Rala Xanana Gusmão no Prezidente Federasaun Rusa, Vladimir Putin, ne’ebé hala’o ona iha fulan-juñu tinan ida-ne’e, iha Kazan, durante Simeira Komemorativa ASEAN-Rúsia.

Iha dada-lia ne’e, Ministru rua ko’alia kona-ba relasaun bilaterál no mós posibilidade atu hametin kooperasaun iha setór oin-oin, liuliu iha setór enerjia no rekursus minerais, peskas, turizmu, edukasaun, komérsiu no investimentu.

Iha área edukasaun, Federasaun Rusa hato’o nia disponibilidade atu kontinua fó oportunidade formasaun ba sidadaun timoroan sira iha universidade no instituisaun ensinu sira seluk iha Rúsia. Parte sira ko’alia mós posibilidade atu hahú fali oportunidade formasaun ba diplomata timoroan sira iha Akademia Diplomátika Ministériu Negósius Estranjeirus Rúsia nian.

País rua ne’e konkorda mós atu hametin kuadru jurídiku kooperasaun nian no promove konsultas regulares entre ida-idak nia Ministériu Negósius Estranjeirus, ho objetivu atu asegura diálogu bilaterál ne’ebé regulár liután.

Sorumutu ne’e ko’alia mós kooperasaun entre ASEAN no Rúsia, hafoin Timor-Leste nia adezaun plena ba organizasaun ne’e, nune’e mós preparasaun nasionál hodi asume Prezidénsia ASEAN nian iha tinan 2029. Governantes reafirma sira-nia apoiu ba knaar sentrál ASEAN nian no analiza forma atu hametin koordenasaun iha fóruns multilaterais, inklui iha ámbitu Nasoins Unidas.

Ministru rua ne’e ko’alia mós preparativu sira hodi komemora aniversáriu estabelesimentu relasoins diplomátikas entre Timor-Leste no Federasaun Rusa ba da-25 iha fulan-maiu tinan 2027, ho inisiativas ne’ebé kria hodi komemora data ne’e.

Vizita ba Moskovu hanesan pasu foun ida iha dezenvolvimentu relasoins diplomátikas entre Timor-Leste no Federasaun Rusa, ne’ebé estabelese ona iha tinan 2002, no mós iha identifikasaun ba área konkreta sira hodi reforsa kooperasaun bilaterál.

url: https://timor-leste.gov.tl?lang=tp&p=52657