Governu Timor-Leste

Iha loron 4 fulan-outubru tinan 2026 Primeiru-Ministru Kay Rala Xanana Gusmão hahú vizita ofisiál ida ba Tailándia, ne’ebé ho objetivu atu hametin relasaun bilaterál no kooperasaun entre nasaun rua ne'e. Dezlokasaun ne’e inklui sorumutu bilaterál ida ho Primeiru-Ministru Tailándia nian, Anutin Charnvirakul, nune’e mós atividade sira iha area finanseira, ambientál, no ekonómika. 

Iha loron 4 fulan- outubru Xefe Governu to'o iha Bangkok no simu iha Aeroportu Internasionál Suvarnabhumi hosi Vise-Primeiru-Ministru no Ministru Negósius Estranjeirus Tailándia nian, Sihasak Phuangketkeow. Delegasaun Timor-Leste sira ne’e maka, Ministra Finansas, Santina Cardoso, no Governador Banku Sentrál Timor-Leste nian, Hélder Lopes.

Iha loron 6 no 7 fulan-outubru, Primeiru-Ministru sei partisipa iha konferénsia ida kona-ba Fundu Petrolíferu, iha Bangkok. Programa ne’e inklui mós vizita ida ba sidade Nonthaburi no  Institutu Ambientál Tailándia nian, nune'e mós sorumutu  ho reprezentantes hosi setór privadu Tailándia nian, inklui  Thai Beverage Public Company Limited, ne'ebé foka liu ba oportunidade kooperasaun ekonómika no investimentu.

Ajenda ofisiál husi vizita ne’e sei hala’o iha loron 9 no 10 fulan-outubru, tuir konvite husi Primeiru-Ministru Tailándia nian, Anutin Charnvirakul. Ida-ne’e sei sai hanesan vizita ofisiál dahuluk nian ba Tailándia hosi Primeiru-Ministru  Timor-Leste ida dezde tinan 2013 no akontese molok komemorasaun, iha tinan 2027, aniversáriu ba dala 25 estabelesimentu hosi relasoins diplomátikas entre nasaun rua ne’e.

Iha loron 9 fulan-outubru, Primeiru-Ministru Anutin Charnvirakul sei prezide serimónia benvindu ofisiál ba Primeiru-Ministru Kay Rala Xanana Gusmão no delegasaun Timor-Leste nian iha Uma Governu (Government House of Thailand), Bangkok. Tuir mai sei hala’o sorumutu bilaterál ida entre Xefe Governu na’in-rua ne’e.

Hein katak dada-lia sira ne'e kobre kooperasaun iha área dezenvolvimentu, defeza no seguransa, inklui kombate ba krime transnasionál, komérsiu no investimentu, seguransa alimentár, enerjia no turizmu, kontaktu entre povu sira, no mós kooperasaun iha ámbitu ASEAN nian.

Diskusaun ne’e sei kobre ba asuntu oioin ne’ebé sai interese komún, hanesan kooperasaun ba dezenvolvimentu; kooperasaun iha área defeza no seguransa, inklui kombate krime transnasionál; komérsiu, investimentu no seguransa alimentár; enerjia no turizmu; konektividade entre povu sira; nune’e mós kooperasaun iha ámbitu ASEAN nian.

Hafoin sorumutu bilaterál, Primeiru-Ministru na'in-rua sei sai sasin ba asinatura akordu ida no partisipa iha konferénsia imprensa konjunta ida. Programa ne’e inklui mós almosu ofisiál ida ne’ebé oferese hosi Primeiru-Ministru tailandés hodi fó onra ba Primeiru-Ministru Timor-Leste nian no ninia delegasaun.

Tailándia no Timor-Leste mantein relasaun besik dezde partisipasaun Tailándia nian iha misaun manutensaun pás iha Timor-Leste iha tinan 1999, no Tailándia hola parte iha grupu dahuluk hosi nasaun sira ne’ebé estabelese relasoins diplomátikas ho Timor-Leste iha tinan 2002.

Vizita ne'e hala'o iha kontestu foun ida iha relasoins entre nasaun rua ne'e, hafoin adezaun Timor-Leste nian ba ASEAN nu'udar Estadu-Membru ba dala 11 iha fulan-outubru tinan 2025, no nu’udar kontinuidade ba kontaktu bilaterál ho objetivu atu habelar kooperasaun polítika, ekonómika no dezenvolvimentu.