Primeiru-Ministru Estadu Nova Gales Sul, Barry O’Farell kompromete ba Ministru Negósiu Estranjeiru Timor-Leste nian, atu identifika fatin própriu hodi tau Konsuladu-Jerál Timor-Leste nian iha kapitál ba Estadu Nova Gales Sul nian, Sydney. Promesa ne’e halo durante vizita Ministru Zacarias Albano da Costa bá Austrália iha loron 15 fulan Juñu ne’e.

Barry O’Farell konkorda mós atu kontinua fó apoiu mai Timor-Leste. Tuir konvite hosi Ministru timoroan ne’e, Barry O’Farell garante katak nia sei halo vizita ida mai Timor-Leste hamutuk ho grupu emprezáriu ida hodi esplora posibilidade negósiu nian.

Durante vizita ida ne’e iha Austrália, Ministru Negósiu Estranjeiru halo enkontru mós ho Komunidade timoroan sira iha Nova Gales Sul, no sira iha Camberra (bainhira Ministru halo vizita ba Embaixada, iha kapitál Austrália nian) no sira iha Estadu Victoria, bainhira Ministru halo vizita ba Melbourne.