Sekretáriu Estadu, Januário Pereira, Vizita Sub-Estasaun Kamea no Sentrál Eléktrika Hera
Sekretáriu Estadu Eletrisidade, Água no Urbanizasaun, Januário Pereira, hala’o vizita iha loron 14 fulan Juñu ba sub-estasaun liña transmisaun sentrál elétrika ólio pezadu iha Kamea, Becora, no prosesu konstrusaun aliserse ba jeradór hitu (7) iha Hera.
Iha vizita ne’e, Sekretáriu Estadu Januário Pereira, haree rasik ho matan prosesu konstrusaun no instalasaun painél kontrolu ne’ebé tékniku xinés sira hosi kompañia konstrusaun China Nuclear Industry 22nd Construction Company, ne’ebé servisu hamutuk ho enjeñeiru sira Timor oan sirahodi halo instalasaun primeiru painél kontrolu nian iha Kamea, hosi painél kontrolu sia (9) ne’ebé sei harii iha territóriu tomak.
“Sentrál Kamea hanesan sentru hafoin sei harri tan iha Manatuto, Baucau, Lospalos, Ainaro, Same, Betano, Kasa no Likisa,” katak Januário Pereira.
Januário Pereira hatutan tan katak, painél kontrolu nia funsaun atu deteta sirkuitu ruma iha área balun tanba painél kontrolu uza hotu sistema dijitál ho komputadór nune’e tékniku EDTL nian bele halo lalais servisu bainhira hetan avaria ruma.
Sekretáriu Estadu Eletrisidade Água no Urbanizasaun, Januário Pereira halo vizita mós ba iha área Hera, ne’ebé sai hanesan fatin konstrusaun sentrál eletrika nian, akompaña hosi Enjeñeiru, Hadi Irawan hosi Indonézia hanesan chief of construction hosi Puri Akraya Engineering Limited ne’ebé hetan sub-kontratu hosi China Nuclear Industry 22nd Construction Company hodi konstroe aliserse ba jeradór hitu (7) ne’ebé iha área Hera nian, ne’ebé ninia ekipamentu pezadu sira sei to’o iha portu provizóriu Behau iha fulan Jullu tinan ida ne’e.
