Diresaun Nasionál Água no Saneamentu (DNAS) Kinta, loron 9, fulan Juñu, 2011, hala’o workshop iha Ministériu Infraestrutura, iha Díli, hodi halibur fasilitadór bee moos no saneamentu subdistritu sira hamutuk nain ualunulu resin ualu (88) hosi distritu 13 ne’ebé hala’o kna’ar iha DNAS iha subdistritu 65 iha teritóriu tomak.

Objetivu prinsipál hosi workshop ne’e hodi esplika importánsia hosi fasilitadór bee moos no saneamentu iha subdistritu sira ba komunidade no mós kona-ba prosesu funsionáriu temporáriu ba permanente.

Iha fatin hanesan Diretór Nasionál DNAS, Eng. João Pereira Jerónimo hateten “setór bee moos hanesan setór ida ne’ebé importante iha nasaun doben Timor Lorosa’e, tan ne’e ita tenke hala’o kna’ar ho responsabilidade ba povu no nasaun nia di’ak maske sei iha frakeza barak maibé ho espiritu nasionalismu no patriotizmu mak kontribuisaun fasilitadór bee moos no saneamentu ba subdistritu sira iha rai ne’e bele hetan valorizasaun di’ak hosi ita nia komunidade”.