Banku Sentrál Timor-Leste no Bank Indonesia reforsa kooperasaun hodi dezenvolve pagamentu dijitál transfronteirisu
Iha loron 25 fulan-setembru tinan 2026, iha Jakarta, Banku Sentrál Timor-Leste (BCTL) no Bank Indonesia (BI) asina Memorandu Entendimentu ida hodi reforsa kooperasaun iha sistema pagamentu no inovasaun finanseira dijitál no mós estabelese baze ba dezenvolvimentu konektividade pagamentu entre Timor-Leste no Indonézia.
Akordu ne’e asina husi Governadór BCTL, Hélder Lopes, no Governadora Bank Indonesia, Destry Damayanti iha ámbitu Festival Ekonomia no Finansas Dijitais Indonézia no mós Indonesia Fintech Summit and Expo 2026 (FEKDI x IFSE 2026), ne’ebé hala’o iha loron 24 fulan-setembru, iha Jakarta.
Memorandu ne’e estabelese kuadru kooperasaun ida iha área sistema pagamentu no likidasaun no mós inovasaun finanseira dijitál, ne’ebé inklui fahe informasaun no reforsu relasaun institusionál entre banku sentrál rua ne’e.
Objetivu prinsipál husi akordu ne’e maka dezenvolve konektividade sistema pagamentu Timor-Leste no Indonézia nian, inklui análize ba ligasaun QRIS Cross-Border iha futuru, sistema indonéziu ne’ebé permite hala’o pagamentu transfronteirisu liuhusi kódigu QR.
Interoperabilidade iha futuru hein katak bele permite utilizadór país rua ne’e nian hala’o pagamentu liuhusi ida-idak nia aplikasaun dijitál no sistema kódigu QR ne’ebé kompativel, hodi fasilita tranzasaun ne’ebé relasiona ho komérsiu, turizmu no mobilidade entre Timor-Leste no Indonézia.
Akordu ho Bank Indonesia fó kontinuasaun ba prosesu modernizasaun no integrasaun rejionál iha sistema pagamentu Timor-Leste nian. Iha loron 12 fulan-setembru, BCTL lansa ofisiálmente Timor Unique QR (TUQR), padraun nasionál kódigu QR ba pagamentu dijitál, ne’ebé kria hodi asegura interoperabilidade entre banku, instituisaun finanseira, empreza teknolojia finanseira no karteira dijitál.
TUQR hetan apoiu husi Ti-Fast, sistema pagamentu instantáneu husi BNCTL, no sai hanesan baze nasionál ba dezenvolvimentu futuru ligasaun ho sistema pagamentu husi país sira seluk.
Iha loron 12 fulan-setembru mós, BCTL no Banku Nasionál Kamboja asina Memorandu Entendimentu ida, iha Dili, ne’ebé foka ba pagamentu dijitál no konektividade transfronteirisa.
Iha okaziaun ne’e, Governadór BCTL fó sai katak akordu hanesan ho Indonézia tuir planu sei asina iha fulan hanesan.
Inisiativa sira-ne’e nu’udar parte hosi prosesu integrasaun finanseira rejionál Timor-Leste nian. Iha fulan-jullu tinan ida-ne’e, Governadór Hélder Lopes hasoru malu ho Sekretáriu-Jerál ASEAN, Kao Kim Hourn, iha sede ASEAN nian, iha Jakarta, hodi ko’alia kona-ba integrasaun finanseira rejionál, konektividade sistema pagamentu no inkluzaun finanseira.
QRIS Cross-Border permite ona ligasaun sistema pagamentu indonéziu ho sistema husi país parseiru oioin. Esperiénsia ne’ebé dezenvolve ona husi Indonézia permite atu utilizadór sira halo pagamentu iha rai-li’ur liuhusi sira-nia aplikasaun nasionál, no mós permite vizitante sira husi país parseiru sira atu utiliza sira-nia sistema pagamentu iha estabelesimentu aderente (partisipante) sira iha Indonézia.
Implementasaun konektividade entre Timor-Leste no Indonézia daudaun ne’e sei depende ba dezenvolvimentu mekanizmu tékniku, regulamentár no operasionál ne’ebé nesesáriu ba interoperabilidade entre ida-idak nia sistema pagamentu.
