Iha loron 28 fulan-setembru tinan 2026, iha Palásiu Governu, Dili, Primeiru-Ministru, Kay Rala Xanana Gusmão simu delegasaun ida husi Misaun Nasoins Unidas ba Avaliasaun Nesesidade Eleitorál (United Nations Electoral Needs Assessment Mission – UN-NAM), ne’ebé daudaun ne’e iha Timor-Leste, tuir pedidu Governu nian, atu avalia nesesidade sira ba asisténsia internasionál iha preparasaun ba siklu eleitorál tuirmai. 

Sorumutu ne’e hetan partisipasaun husi Ministru Administrasaun Estatál, Tomás do Rosário Cabral, Koordenadora Rezidente Nasoins Unidas iha Timor-Leste, Funmi Balogun, Reprezentante Rezidente Programa Nasoins Unidas nian ba Dezenvolvimentu (PNUD) iha Timor-Leste, Katyna Argueta, no Zoran Trajkovski, Divizaun Asisténsia Eleitorál Departamentu Asuntus Polítikus no Konstrusaun Pás Nasoins Unidas nian, ne’ebé halo parte iha Misaun Avaliasaun ba Nesesidade Eleitorál.

Misaun ne’e ho objetivu atu identifika nesesidade no modalidade sira ba asisténsia eleitorál ne’ebé bele fornese ba Timor-Leste, ne’ebé inklui apoiu tékniku no institusionál ba Sekretariadu Tékniku Administrasaun Eleitorál (STAE), Komisaun Nasionál Eleisaun (CNE), no organizasaun sosiedade sivíl sira.

Área sira ne’ebé ko’alia mak edukasaun sívika, atualizasaun no rejistu biométriku ba eleitór sira, preparasaun votasaun ba sidadaun timoroan sira iha rai-li’ur, no mós prosedimentu sira seluk ne’ebé relasiona ho organizasaun prosesu eleisaun. Governu no parseiru internasionál sira mós sei kontinua diskusaun kona-ba partisipasaun hosi observadór internasionál sira.

Durante sorumutu ne’e, Primeiru-Ministru afirma katak prezensa observadór internasionál sira nian la’ós de’it iha Dili, maibé tenke kobre mós munisípiu no komunidade lokál sira, atu nune’e bele permite monitorizasaun ba prosesu eleitorál iha fatin oioin iha territóriu nasionál tomak.

Ministru Administrasaun Estatál hateten katak STAE sei kontinua serbisu ho PNUD iha preparasaun kondisaun sira ne’ebé nesesária atu hala’o eleisaun tuirmai no mós iha definisaun ba modalidade kooperasaun ho parseiru internasionál sira.

Timor-Leste sei hala’o eleisaun prezidensiál no eleisaun ba órgaun podér lokál sira iha tinan 2027, ho eleisaun parlamentár ne’ebé marka ona ba tinan 2028.

Misaun Nasoins Unidas ba Avaliasaun Nesesidade Eleitorál sei kontinua konsulta ho instituisaun nasionál sira hodi identifika área no mekanizmu sira ba asisténsia internasionál iha preparasaun ba prosesu eleisaun tuirmai.