Vise-Ministru Infraestrutura, José Manuel Carrascalão, iha fulan Maiu nia rohan, simu ekipamentu pezadu ba projetu haluan lurón iha distritu Manatutu, Baukau no Vikeke. Institutu Jestaun Ekipamentu (IJE), hetan kamiaun halibur fo’er neen, tanki bee nian tolu no retroeskavadór  tolu, liu husi konkursu públiku ne’ebé fó sai iha tinan 2010, ho ninia folin osan dólar amerikanu maizumenus millaun 9.

Vise-Ministru Infraestrutura, fó hatene ba operadór sira, atu uza didi’ak Estadu nia ekipamentu foun hirak ne’e, hodi fó hanoin katak “mandatu Governu Aliansa Maioria Parlamentár, sei hakotu iha tinan ida nia laran, maibé, imi operadór sira sei kontinua nafatin no imi tenke hatudu imi nia profisionalismu”.

Diretór IJE, Rui Hernâni, fó sai katak, tuir enkomenda uluk ninian, sei falta atu simu ekipamentu balun. Ekipamentu hirak ne’e, husu ho urjénsia atu bele hala’o dezenvolvimentu servisu projetu óleo pezadu nian iha área Manatutu, Baukau no Vikeke.