Governu Timor-Leste

Vise-Ministru ba Operasaun Ospitais, Flávio Brandão Mendes de Araújo, iha loron 19 fulan-setembru tinan 2026, iha Palásiu Nobre Lahane, Dili, partisipa iha serimónia komemorasaun aniversáriu Asosiasaun Médiku Timor-Leste (AMTL) ba da-21, iha ne’ebé asina Memorandu Entendimentu ida entre AMTL no Malaysian Medical Association (MMA). 

Serimónia ne'e hala'o ho tema «Estabelesimentu Konsellu Médiku Timor-Leste ba kualidade no exelénsia kuidadu saúde nian» no halibur membrus hosi AMTL, reprezentantes hosi instituisaun nasionál sira, no mós parseirus iha setór saúde nian.

Iha ninia intervensaun, Vise-Ministru, lori Ministériu Saúde nia naran, hato’o parabéns ba AMTL iha ninia aniversáriu ba da-21 no destaka dirijente no mós membru sira-nia kontribuisaun hodi hametin sistema saúde no servisus médikus iha territóriu nasionál tomak.

Flávio Brandão Mendes de Araújo mós reafirma apoiu Ministériu Saúde nian ba prosesu estabelesimentu Konsellu Médiku Timor-Leste nian, nu’udar instrumentu ida atu hametin kualidade servisus, profisionalizmu no regulamentu bainhira hala’o knaar nu’udar médiku.

Iha ámbitu komemorasaun ne’e, Prezidente AMTL, Herculano Seixas dos Santos, no eis-Prezidente hosi Malaysian Medical Association, Thirunaavavukarasu Rajoo, asina Memorandu Entendimentu ida ne’ebé ho objetivu atu hametin kooperasaun entre organizasaun rua-ne’e.

Akordu ne’e kobre área sira hanesan edukasaun no formasaun ba membru sira, interkámbiu profisionál, peskiza, no mós servisu kuidadu saúde primáriu.

Serimónia ne’e sura ho prezensa hosi Reprezentante Organizasaun Mundiál Saúde iha Timor-Leste, Arvind Mathur, membrus Parlamentu Nasionál, reprezentantes Provedoria Direitus Umanus no Justisa, Malaysian Medical Association, dirijentes no membrus AMTL, no mós konvidadu sira-seluk.