Governu lansa projetu reabilitasaun ba estrada Bobonaru-Lolotoe

Iha loron 19 fulan-setembru tinan 2026, iha munisípiu Bobonaru, Ministru Obras Públikas, Samuel Marçal, lansa projetu reabilitasaun ba estrada kuaze kilómetru 8,9 entre Bobonaru no Lolotoe, ho valór dolar amerikanu millaun 11,98 no prazu ezekusaun fulan 18.

Projetu ne’e ho objetivu atu hadi’a kondisaun ba sirkulasaun iha parte ida-ne’e no mós hadi’a asesu komunidade sira nian ba merkadu, estabelesimentu ensinu no servisu saúde sira.

Iha serimónia ne’e, Ministru Obras Públikas esplika katak “hafoin lansamentu, sei fó tempu fulan tolu ba empreza atu mobiliza ekipamentus no instala ninia estaleiru (fatin rai ekipamentu konstrusaun no materiál konstrusaun nian). Tanba ne’e, ami husu ba komunidade atu koopera no labele kria obstákulu”, Samuel Marçal hateten.

Dezlokasaun ba Lolotoe permite mós Ministru no komitiva atu observa diretamente kondisaun infraestrutura lokál no halibur informasaun kona-ba nesesidade ne’ebé komunidade sira hato’o.

 “Ho dalan ida-ne’e, ita hotu-hotu bele iha vizaun komún ida kona-ba dezenvolvimentu nasaun nian. Informasaun sira ne’ebé ami rekolle iha terrenu tuir mai sei hato’o ba Xefe Governu”, afirma Ministru.

Administradór Postu Administrativu Lolotoe, Quintino Santos de Jesus, hato’o apoiu husi autoridade lokál sira ba ezekusaun projetu ne’e no husu atu konsidera mós intervensaun sira iha estrada Mapelai no Molop Tobur.

Administradór aprezenta mós nesesidade atu habelar rede elétrika ba aldeia Oelaka, subaldeia Oburo, no fó-sai katak sei submete proposta ida ba Ministériu Obras Públikas hodi hetan apresiasaun.

Reprezentante husi komunidade Lolotoe, Veneranda Santos, destaka efeitu sira ne’ebé sira hein iha reabilitasaun estrada ne’e ba populasaun sira-nia viajen no iha asesu ba servisus.

 “Ida-ne’e signifika katak Governu rona ona ami-nia preokupasaun no buka hela dalan atu rezolve problema sira ne’ebé ami hasoru iha tinan barak nia laran”, nia hatete.

Iha Postu Administrativu Lolotoe mós, Ministru Obras Públikas inaugura projetu melloramentu ida ba sistema abastesimentu bee-moos.

Atividade iha Bobonaru nu’udar kontinuasaun hosi dezlokasaun Ministériu Obras Públikas nian ba munisípius hodi akompaña no ezekuta projetu infraestrutura sira. Iha loron 18 fulan-setembru liubá, Ministru Samuel Marçal inaugura sistema eletrifikasaun no abastesimentu bee-moos foun iha Postu Administrativu Atsabe no Letefoho, munisípiu Ermera.

  Nune’e mós iha munisípiu Ermera, reabilitasaun estrada rurál Lihu–Railaco Craic foin lalais ne’e remata ona, uza pavimentu betaun reforsadu ho fibra (Fibre Reinforced Concrete -FRC). Intervensaun ne’e realiza iha ámbitu kooperasaun entre Governu Timor-Leste no Governu Austrália, liuhusi programa PARTSIPA, iha koordenasaun ho Ministériu Obras Públikas, autoridade munisipál no komunidade lokál sira.

Intervensaun sira-ne’e nu’udar parte hosi esforsu sira ne’ebé daudaun ne’e la’o hela hodi hadi’a ligasaun rodoviária no habelar asesu komunidade sira nian ba eletrisidade, bee-moos, no mós servisu báziku sira seluk iha munisípius.

 

 

 

url: https://timor-leste.gov.tl?lang=tp&p=52001