Iha loron 17 fulan-setembru tinan 2026, iha Lizboa, Ministra Solidariedade Sosiál no Inkluzaun, Verónica das Dores, no Ministra Traballu, Solidariedade no Seguransa Sosiál Portugál nian, Maria do Rosário Palma Ramalho, asina Programa Kooperasaun Bilaterál ba períodu 2026-2028, ne’ebé ho objetivu atu reforsa kooperasaun iha área protesaun sosiál no seguransa sosiál, ho foku liu ba luta hasoru moris-ki’ak no kapasitasaun institusionál. 

Programa foun ne’e fó kontinuasaun ba kooperasaun ne’ebé dezenvolve ona entre país rua iha setór ida-ne’e dezde 2003 no enkuadra iha Programa Estratéjiku Kooperasaun (PEC, sigla iha lian portugés) 2024-2028 entre Timor-Leste no Portugál.

Iha área luta hasoru moris-kiak, kooperasaun ne’e foka liu iha apoiu ba programa no ekipamentu sosiál ne’ebé destina ba ema no família sira ne’ebé iha situasaun vulneravel. Apoiu ne’e kanaliza liuhusi instituisaun solidariedade sosiál, parseiras Governu Timor-Leste nian, no finansia hamutuk husi Ministériu sira ne’ebé responsavel ba área solidariedade sosiál husi país rua ne’e.

Iha nia intervensaun, Ministra Verónica das Dores destaka kontribuisaun instituisaun sira-ne’e nian ba estensaun protesaun sosiál ba komunidade sira, inklui iha rejiaun no populasaun sira ne’ebé izolada liu, no mós reafirma kompromisu Timor-Leste nian atu kontinua apoia serbisu ne’ebé hala’o ona husi entidade sira-ne’e.

Programa 2026-2028 prevee mós kontinuasaun no reforsu ba kapasitasaun institusionál, liuhusi formasaun espesializada ba kuadrus téknikus no apoiu ba konsolidasaun sistema seguransa sosiál Timor-Leste nian. Kooperasaun ida-ne’e inklui apoiu tékniku no normativu no mós atividade formasaun kontínua ho akompañamentu hosi organizmus Seguransa Sosiál Portugál nian.

Ministra ne’e afirma katak, liuhusi kooperasaun ida-ne’e, “Seguransa Sosiál Portugál nian, ne’ebé envolve organizmu oin-oin, ajuda atu konstrui no konsolida sistema seguransa sosiál ida ne’ebé forte, sólidu no sustentavel liu, hodi respeita nafatin autonomia tomak no desizoins polítikas Timor-Leste nian”.

Verónica das Dores hatutan katak Programa foun ne’e ho objetivu atu reforsa serbisu ida-ne’e no habelar kooperasaun ba área sira seluk, nune’e mós kria kondisaun hodi hasa’e kapasidade téknika ba profisionál sira husi instituisoins Seguransa Sosiál Timor-Leste nian.

Ministra Traballu, Solidariedade no Seguransa Sosiál Portugál, Maria do Rosário Palma Ramalho, destaka katak asinatura ne’e reprezenta kontinuidade kooperasaun entre país rua no mós serbisu hamutuk iha área solidariedade sosiál.

Serimónia ne’e marka prezensa husi Sekretária Estadu Negósius Estranjeirus no Kooperasaun Portugál, Sekretáriu Estadu Adjuntu no Traballu, reprezentantes diplomátikus, no mós responsavel instituisaun Seguransa Sosiál país rua ne’e nian, Camões, Institutu Kooperasaun no Língua, no responsavel sira seluk husi delegasaun rua ne’e nian.

Programa Kooperasaun Bilaterál 2026-2028 sei fó kontinuasaun ba projetu konjuntu sira hodi luta hasoru moris-kiak, kapasitasaun institusionál no konsolidasaun sistema seguransa sosiál iha Timor-Leste.