TIMOR GAP, E.P. no Autoridade Nasionál Petróleu (ANP), partisipa iha eventu setór enerjétiku internasionál rua iha Tailándia no Malázia durante fulan-setembru tinan 2026, iha ne’ebé sira aprezenta potensiál petrolíferu no enerjétiku Timor-Leste nian, oportunidade investimentu, no mós perspetiva kooperasaun ho empreza no parseiru internasionál sira.

iha loron 14 to’o 17 fulan-setembru, TIMOR GAP no ANP partisipa iha Gastech 2026, ne’ebé realiza iha Bangkok International Trade & Exhibition Centre, Bankoke, Tailándia. Konferénsia no espozisaun ne’e halibur reprezentante sira hosi emprezas, governus, investidór sira, no interveniente internasionál sira seluk hosi setór gás naturál, gás naturál likefeitu  (GNL), idrojéniu, teknolojias klimátikas, no enerjia.

Partisipasaun husi instituisaun rua ne’e inklui sesaun konferénsia, aprezentasaun, meza-redonda, sorumutu bilaterál, no atividade sira iha área espozisaun nian, ne’ebé ho objetivu atu fahe informasaun kona-ba  rekursu enerjétiku Timor-Leste nian no estabelese kontaktu ho investidór no parseiru potensiál sira iha setór ne’e.

Iha painél lideransa ezekutiva ho títulu “Kreximentu ekonomia, kreximentu prokura: Oinsá maka sei dudu era industriál tuirmai”, Diretór-Jerál TIMOR GAP, Sebastião Pereira ko’alia kona-ba perspetiva kreximentu ba prokura GNL iha Sudeste Aziátiku, liga ba kreximentu ekonómiku, industrializasaun, eletrifikasaun, no expansaun infraestrutura dijitál.

Partisipasaun iha Gastech hafoin TIMOR GAP no ANP nia prezensa iha Oil & Gas Asia (OGA) 2026, ne’ebé hala’o iha loron 2 to’o 4 fulan-setembru iha Kuala Lumpur Convention Centre, iha Malázia. Durante eventu ida-ne’e, instituisaun rua ne’e hamutuk realiza “Forum Negósius  no Investimentu Timor-Leste”, ne’ebé foka ba oportunidade investimentu no mós dezenvolvimentu negósius iha indústria petrolífera nasionál.

Forum ne’e konta ho intervensaun hosi  ANP, TIMOR GAP, TradeInvest Timor-Leste, no reprezentantes husi operadór no empreza fornesedór servisu sira. Sesaun abertura ne’e lidera husi Vise-Prezidente ANP ba Envolvimentu Partes Interesadas no Fiskalizasaun Konteúdu Lokál, Quintino Pereira Bere, tuir fali ho diskursu husi Embaixadór Timor-Leste nian ba Malázia, Lisualdo Gaspar. Eventu ne’e enserra hosi Vise-Prezidente TIMOR GAP ba Teknolojia no Dezenvolvimentu Ativus, Domingos Lequisiga.

Partisipante liu 100, inklui reprezentante governu, dirijente emprezariál sira hosi nasaun sira ASEAN nian, no mós parte interesada sira hosi indústria petróleu no gás nian, partisipa iha Forum ne’e, ne’ebé fó oportunidade atu aprezenta kondisaun no oportunidade sira hodi investe no mós dezenvolve atividade emprezariál iha setór petrolíferu Timor-Leste nian.

Durante OGA 2026, ANP mós hala’o sesaun ida ho fornesedór potensiál sira Malázia nian, ne’ebé halibur reprezentante liu 60 hosi empreza fornesedór no prestadór servisu sira. Iha área espozisaun OGA, ANP aprezenta setór petrolíferu Timor-Leste nian, operasaun sira ne’ebé la’o hela, no mós oportunidades ne’ebé eziste ba investidór sira. Diretór Ezekutivu Esplorasaun no Dezenvolvimentu ANP nian, Francelino Conceição, partisipa mós iha sesaun Speak OGA, iha ne’ebé nia aprezenta oportunidade investimentu iha setór petróleu no gás, serbisu kona-ba revizaun ba kuadru jurídiku  no fiskál, no mós preparasaun sira ba ronda lisensiamentu tuirmai ba área petrolífera sira iha Timor-Leste, ne’ebé marka ona ba tinan 2027.