Governu Timor-Leste

Iha loron 15 fulan-setembru tinan 2026, iha Palm Spring Hotel, Dili, Sekretáriu Estadu Kooperativas, Arsénio Pereira da Silva hasoru malu ho Embaixadores  no reprezentantes diplomátikus akreditadus husi Estadus-Membrus ASEAN nian iha Timor-Leste, hodi ko’alia ba preparasaun sira Konferénsia Rejionál Dili nian kona-ba Diálogu Ministeriál Kooperativas (DRCCMD), ne’ebé marka ba inísiu fulan-outubru, iha kapitál Timor-Leste nian. 

Sorumutu ne’e fó  oportunidade atu avalia progresu preparasaun konferénsia ne’e nian no partisipasaun husi reprezentante governmental sira ne’ebé responsavel ba setór kooperativas husi país ASEAN nian sira. Indonézia no Malázia konfirma ona sira-nia partisipasaun, enkuantu kontaktu sira hala'o hela ho Estadu-Membru sira seluk atu konklui sira ida-idak nia konfirmasaun.

Sorumutu ne’e organiza husi Embaixadór Malázia ba Timor-Leste, Fairuz Rozali, no hetan partisipasaun husi Embaixadór Kamboja, Chun Sovannarith; Embaixadora Filipinas, Mary Anne A. Padua; Embaixadór Singapura, Teo Lay Cheng; Enkarregadu  Negósius Embaixada Indonézia nian, Raden Sakunto Paksi; Xefe Adjuntu Misaun Embaixada Vietname nian, Ngoc Anh Nguyen; no mós Embaixadór Brunei Darussalam, Khairur Rizal ADB Majid.

Sorumutu ne’e hetan mós partisipasaun husi reprezentante sira husi Ministériu Negósius Estranjeirus no Kooperasaun no mós dirijente no asesór sira husi Sekretaria Estadu Kooperativas.

DRCCMD ne’e hein katak bele halibur responsavel governamentál no reprezentante sira setor ne’e nian atu promove partilla esperiénsia, koñesimentu no prátika sira iha dezenvolvimentu kooperasaun nian no mós analiza oportunidade kooperasaun rejionál sira iha área ida-ne'e.

Sekretaria Estadu Kooperativas kontinua halo koordenasaun ho reprezentantes husi Estadus-Membrus ASEAN nian hodi konklui preparasaun no partisipasaun  delegasaun sira-nian iha konferénsia ne’e.