Hahú konstrusaun ba terminál pasajeiru foun iha Aeroportu Internasionál Prezidente Nicolau Lobato
Ministru Transportes no Komunikasoins, Miguel Marques Gonçalves Manetelu, iha loron 14 fulan-setembru tinan 2026, partisipa iha serimónia ida iha Dili ne’ebé marka inísiu ba serbisu konstrusaun terminál pasajeiru foun iha Aeroportu Internasionál Prezidente Nicolau Lobato, ne’ebé hala’o husi empreza japoneza TOA Corporation. 
Serimónia ne’e marka prezensa husi Ministru Planeamentu no Investimentu Estratéjiku, Gastão de Sousa, Embaixadór Japaun ba Timor-Leste, Yamamoto Yasushi, Reprezentante-Xefe Ajénsia Kooperasaun Internasionál Japaun (JICA) nian iha Timor-Leste, Daisuke Fukumori, reprezentantes AERO Dili, Banku Aziátiku Dezenvolvimentu (BAD), Departamentu Negósius Estranjeirus no Komérsiu Austrália (DFAT) no entidade sira seluk ne’ebé envolve iha projetu ne’e.
Inísiu konstrusaun ba terminál ne’e nu’udar kontinuasaun hosi prosesu dezenvolvimentu no expansaun Aeroportu Internasionál Prezidente Nicolau Lobato, ne’ebé ofisialmente lansa iha loron 20 fulan-maiu tinan 2025, hafoin faze planeamentu, estudus téknikus, mobilizasaun finansiamentu, no mós koordenasaun entre instituisaun no parseiru dezenvolvimentu sira.
Iha nia diskursu, Ministru Miguel Marques Gonçalves Manetelu esklarese katak “serimónia ida-ne’e (…) la’ós lansamentu foun ida, no la’ós lansamentu daruak husi projetu ida-ne’e, maibé hanesan “kontinuasaun husi kompromisu ne’ebé halo iha loron 20 fulan-maiu tinan 2025 no marka inísiu ba etapa konkreta ida ne’ebé foun: inísiu husi serbisu konstrusaun edifísiu terminál pasajeiru nian ne’ebé foun”.
Kontratu ba konstrusaun terminál pasajeiru foun ne’e asina iha loron 20 fulan-fevereiru tinan 2026. Terminál ne’e hanesan komponente prinsipál ida husi programa dezenvolvimentu no expansaun aeroportu ne’ebé integradu, no tenke kumpre rekizitus téknikus, seguransa, integrasaun sistemas aeroportuárius, no mós padraun internasionál aviasaun nian.
Konstrusaun ne’e tenke koordenada ho projetu sira seluk ne’ebé daudaun ne’e la’o iha aeroportu, hanesan obras iha área operasionál aeroportuária, ne’ebé hetan apoiu husi Banku Aziátiku Dezenvolvimentu, no mós infraestruturas asesu no instalasaun komplementár sira ne’ebé apoia husi Austrália. Komponente sira-ne’e nu’udar parte hosi programa expansaun no modernizasaun ba Aeroportu Internasionál Prezidente Nicolau Lobato.
Ministru ne’e hateten katak kalendáriu kontratuál prevee konkluzaun serbisu ne’e besik tinan 2028 nia rohan, maibé nia reafirma meta ne’ebé Governu define ona atu konklui aeroportu ne’e, hodi inklui terminál pasajeiru foun, to’o loron 20 fulan-maiu tinan 2028.
Tuir governante ne’e, meta ida-ne’e relasiona mós ho preparasaun infraestruturas nasionais ba Prezidénsia Timor-Leste nian ba ASEAN iha futuru. To’o tempu ne’ebá, sei presiza prepara ekipa operasionál sira, koko instalasoins foun, no mós asegura kondisoins ba operasaun aeroportu nian.
“Edifísiu terminál pasajeiru nian ne’ebé foun nu’udar espasu dahuluk ne’ebé ema haree bainhira sira to’o mai Timor-Leste no fatin ikus ne’ebé sira haree bainhira husik ita-nia rain. Tanba ne’e, terminál tenke modernu, seguru, efisiente no funsionál, no mós tenke reflete ita-nia identidade, ospitalidade no dignidade nu’udar nasaun”, hatete Ministru.
Miguel Marques Gonçalves Manetelu husu ba empreza konstrutora atu mobiliza lalais rekursus umanus, ekipamentus, materiais no kapasidade téknika ne’ebé presiza hodi hala’o serbisu ne’e, no mós destaka nesesidade koordenasaun entre Governu, empreza, konsultór, autoridade aeroportuária no parseiru sira ne’ebé envolve.
Reprezentante-Xefe JICA iha Timor-Leste, Daisuke Fukumori, destaka ligasaun entre melloria infraestruturas aeroportuárias no integrasaun rejionál país nian.
“Edifísiu terminál pasajeirus ne’e sei sai hanesan odamatan entrada ida ne’ebé importante ne’ebé liga Timor-Leste ho ASEAN no komunidade internasionál, fasilita sirkulasaun ema, sasán no ideias, no mós kontribui ba dezenvolvimentu ekonómiku país nian no ba nia kompetitividade rejionál”, nia afirma.
Terminál pasajeiru foun ne’e nu’udar parte hosi projetus lubun ne’ebé ho objetivu atu habelar no moderniza Aeroportu Internasionál Prezidente Nicolau Lobato, ne’ebé realiza hosi Governu Timor-Leste ho apoiu hosi parseiru dezenvolvimentu sira.
