Iha loron 10 fulan-setembru tinan 2026, Ministra Edukasaun, Dulce de Jesus Soares, inaugura Eskola Bázika Filiál 20 de Agosto (EBF) iha aldeia Passa-Hei, suku Talimoro, postu administrativu Ermera no munisípiu Ermera. Iha loron hanesan, hala’o mós vizita ba Eskola Ensinu Báziku Filiál (EEBF) 1 no 2 iha Fahiteen, hodi halo monitorizasaun ba implementasaun Programa Merenda Eskolár no prosesu ensinu-aprendizajen. 
Serimónia inaugurasaun ba EBF 20 de Agosto ne’e sura ho partisipasaun hosi Embaixadora Boa Vontade ba Edukasaun, Kirsty Sword Gusmão, reprezentante sira husi organizasaun Spend It Well, autoridade munisipál no autoridade lokál, dirijente eskola, profesór, alunu, inan-aman no enkarregadu edukasaun, no mós membru komunidade sira.
Infraestrutura eskolár ne’ebé foun nu’udar rezultadu kooperasaun entre Ministériu Edukasaun, Spend It Well, doadór sira no komunidade lokál, ho objetivu atu hasae asesu ba edukasaun iha área rurál sira.
Iha serimónia ne’e, Ministra Dulce de Jesus Soares destaka kontribuisaun hosi Spend It Well ba konstrusaun no reabilitasaun eskola sira iha país ne’e.
“Ha’u sente orgullu tanba organizasaun ida hanesan Spend It Well maske nu’udar ONG ki’ik maibé konsege harii no reabilita eskola barak iha tempu ida ne’ebé maizumenus badak. Ne’e kontribuisaun ida ne’ebé signifikativu tebes ba Ministériu Edukasaun”, nia hateten.
Ministra mós salienta katak eskola foun ne’e hein katak la’ós de’it ba estudante atuál sira maibé mós ba jerasaun sira iha futuru. “Apoiu ne’ebé ohin ita simu sei fó benefísiu la’ós de’it ba estudante sira ne’ebé agora daudaun aprende iha eskola ne’e, maibé mós ba jerasaun sira iha futuru”, nia hatete.
Dulce de Jesus Soares mós hato’o agradesimentu ba apoiu finanseiru hosi doadór prinsipál projetu ne’e nian, Dr. Gerry McGushin, serbisu hosi ekipa tékniku Spend It Well nian, no komunidade nia envolvimentu. Nia mós rekoñese kontribuisaun husi Embaixadora Boa Vontade ba Edukasaun, Kirsty Sword Gusmão, ba kooperasaun entre Ministériu ho organizasaun ne’e.
Ministra apela ba inan-aman, enkarregadu edukasaun no komunidade atu tau-matan ba instalasaun foun sira-ne’e. “Favór ida, konsidera eskola ida-ne’e hanesan rikusoin no rekursu importante ida ba komunidade tomak. Alunu sira sei uza fatin ida-ne’e loroloron hodi aprende no hasa’e sira-nia kapasidade”, nia hatete.
Nafatin iha munisípiu Ermera, Ministra hala’o vizita ida ba eskola EEBF 1 no 2 iha Fahiteen, iha ne’ebé nia observa preparasaun no distribuisaun merenda eskolár no mós verifika kumprimentu ba menu ne’ebé estabelese ona. Vizita ne’e inklui mós observasaun ba prosesu aprendizajen no interasaun entre manorin no estudante sira.
Ministériu Edukasaun kontinua halo supervizaun no monitorizasaun ba Programa Merenda Eskolár, iha koordenasaun ho Ministériu Administrasaun Estatál, hodi verifika kumprimentu ba regra no padraun sira ne’ebé define ona.
Programa Merenda Eskolár ne’e ho objetivu atu hadi’a estudante sira-nia nutrisaun liuhosi asesu ba ai-han loroloron ne’ebé saudavel no nutritivu, apoia konsentrasaun, partisipasaun no frekuénsia eskolár, no mós promove utilizasaun ba produtu lokál liuhosi sosa ai-han diretamente hosi agrikultór no produtór sira.