Sorumutu ba Parseiru Dezenvolvimentu sira Timor-Leste nian (SPDTL) sei hala’o iha Sentru Konferénsia nian, iha Díli, entre loron 11 no 13 fulan Jullu. Eventu ne’e sei hala’o ho diálogu iha loron tolu tutuir malu.
Iha loron dahuluk, hafoin liu tiha sorumutu bilaterál sira, Prezidente Repúblika Timor-Leste nian, Dr. José Ramos-Horta sei oferese jantar ida ba xefe sira delegasaun nian.
Iha loron daruak, Primeiru-Ministru Timor-Leste nian, Kay Rala Xanana Gusmão, sei halo lansamentu ofisiál ba “Planu Estratéjiku Dezenvolvimentu nian (PED)”. Prevee ona intervensaun oin-oin ne’ebé sei hato’o hosi: Haruhito Kuroda, Prezidente Banku Dezenvolvimentu Aziátiku nian, kona-ba “Vizaun ba Ázia iha tinan 2030 – Investe iha Futuru Timor-Leste nian”; Reprezentante Banku Mundiál, kona-ba “Saída Timor-Leste nian hosi Frajilidade”; no hosi Profesór Jeffrey Sachs, Diretór ba Institutu Terra Universidade Columbia nian, kona-ba “Trajetória Dezenvolvimentu Timor-Leste nian”.
Sorumutu ne’e sei konta mós ho debate sira iha meza kabuar ne’ebé sei ko’alia iha área hirak importante sira kona-ba: Agrikultura, Petróleu no Gás, Turismu, Edukasaun no Saúde, no Governasaun di’ak, ne’ebé sei prezide hosi Ministru no Sekretáriu Estadu sira.