Uma tradisionál liu 20 hosi 46 liuhosi programa "Abitasaun Dignu" Governu nian harii tiha ona
Iha loron 13 fulan-setembru tinan 2026, Vise-Primeiru-Ministru no Ministru Dezenvolvimentu Rurál no Abitasaun Komunitária, Mariano Assanami Sabino, observa servisu rekonstrusaun ba uma tradisionál 46 iha Aldeia Loro, Suku Suai Loro, Munisípiu Kovalima , iha ne'ebé mak konstrui fali ona uma liu 20 iha ámbitu programa "Uma Dignu". 
Programa ne’e, ne’ebé hahú iha fulan-janeiru tinan ida-ne’e hosi Ministériu Dezenvolvimentu Rurál no Abitasaun Komunitária, ho objetivu atu hadi’a kondisaun uma família nian no mós prezerva karakterístika uma tradisionál no identidade kulturál komunidade nian.
Durante vizita ne’e, Vise-Primeiru-Ministru akompaña husi Diretór-Jerál Dezenvolvimentu Rurál, Filipe Cardoso Vieira, no observa progresu servisu no mós implementasaun programa hamutuk ho komunidade.
Uma tradisionál sira iha Suai Loro, ne’ebé koñesidu iha Tetum Terik ho naran “Laleo Masin”, harii ho materiál lokál no téknika tradisionál sira. Projetu ne'e kobre uma sira ne'ebé, tanba tempu ne'ebé liu, sai aat no laiha kondisaun ne’ebé adekuadu.
Tuir ekipa téknika hosi Diresaun-Jerál Abitasaun nian, husi uma 46 ne’ebé planeia ona, liu 20 mak harii fali ona. Servisu sira ne’e tenke kontinua durante tinan 2026 to'o uma restante sira ne’e remata.
Uma ida-idak nia dimensaun maizumenus metru hitu ho neen, no prosesu rekonstrusaun mantein modelu tradisionál, uza materiál lokál sira.
Durante vizita ne’e, membru komunidade sira agradese ba Governu nia programa no destaka nia kontribuisaun ba prezervasaun uma tradisionál sira.
Augusto da Costa, abitante husi suku ida-ne’e, hateten katak “programa ida-ne’e importante tebes ba komunidade Aldeia Loro tomak, tanba maioria populasaun hela iha uma tradisionál sira. Uma sira ne’e balun laiha ona kondisaun di’ak no, liuhusi intervensaun ida-ne’e husi Ministériu ne’e, hadi’a daudaun uma sira ne’e”.
Augusto da Costa destaka mós dimensaun kulturál hosi inisiativa ne’e: “Nu’udar jerasaun foun Aldeia Loro nian, ami konsidera katak programa ida-ne’e kontribui atu prezerva ami-nia eransa no mantein nafatin ami-nia identidade ne’ebé loloos ba jerasaun sira iha futuru”.
Rekonstrusaun ba uma 46 ne'e halo parte iha programa "Uma Dignu" hosi Ministériu Dezenvolvimentu Rurál no Abitasaun Komunitária, no tuir planu sei remata iha tinan ida-ne'e.
