Vise-Primeiru-Ministru, Ministru Koordenadór Asuntus Sosiais no Ministru Interinu Ensinu Superiór, Siénsia no Kultura, Mariano Assanami Sabino, iha loron 8 fulan-setembru tinan 2026, partisipa iha Sentru Kulturál Indonézia iha Dili, iha Feira Ensinu Superiór Indonézia 2026, ne’ebé ho objetivu atu divulga oportunidade formasaun akadémika no bolsa estudu ba estudante timoroan sira iha Indonézia. 

Inisiativa ne’e, ho tema “Loke oportunidade ba futuru no hametin amizade entre Indonézia no Timor-Leste”, halibur universidade indonézia liu 25, ne’ebé aprezenta sira-nia oferta kursu, kritériu asesu, no oportunidade apoiu ba estudu iha área estudu oioin.

Eventu ne’e organiza hosi Sentru Kulturál Indonézia, iha kooperasaun ho Embaixada Repúblika Indonézia iha Timor-Leste no entidade sira setór edukativu Indonézia nian, no hala’o to’o loron 10 fulan-setembru.

Vise-Primeiru-Ministru destaka feira ne’e nia kontribuisaun hodi fasilita asesu ba estudante sira, liuliu finalista husi eskola sekundária, ba asesu informasaun kona-ba universidade no bolsa estudu sira ne’ebé disponivel iha Indonézia. Mariano Assanami Sabino mós mensiona kontribuisaun husi tipu inisiativa ida-ne’e ba kooperasaun entre Timor-Leste ho Indonézia iha setór edukasaun.

Ministru Juventude, Desportu, Arte no Kultura, Nelyo Isaac Sarmento, akompaña Vise-Primeiru-Ministru durante nia partisipasaun iha eventu ne’e.

Durante feira hala’o, instituisaun partisipante sira fornese informasaun kona-ba programa ensinu sira iha área saúde, teknolojia, negósiu no jestaun, no mós área sira seluk, inklui prosedimentus admisaun no oportunidade sira ba bolsa estudu nian. Programa ne’e mós inklui aprezentasaun, rejistu, teste no enkontru ne’ebé ho objetivu atu fasilita kontaktu no parseria entre instituisaun sira.

Tuir informasaun ne’ebé hato’o durante eventu ne’e hosi Adidu Edukasaun Indonézia, entre estudante timoroan hamutuk rihun 10 to’o rihun 12 maka rejista iha nasaun ne’ebá, no númeru loloos bele aas liu tanba sei iha estudante sira ne’ebé seidauk rejista.

Iha kontestu ida-ne’e, autoridade indonézia apela ona ba estudante timoroan sira ne’ebé estuda hela iha universidade sira iha Indonézia atu halo rejistu iha entidade konsulár relevante sira hodi nune’e bele fasilita sira-nia monitorizasaun.