Iha loron 12 fulan-setembru tinan 2026,  Primeiru-Ministru Kay Rala Xanana Gusmão, akompaña hosi Ministru Obras Públikas, Samuel Marçal, halo lansamentu ba projetu reabilitasaun estrada hosi suku  Humboe to’o Vila Antiga Ermera, iha Ermera. Projetu ne’e kobre distánsia ida ho kilómetru 15 no ho investimentu dolar amerikanu millaun 3,35. Serimónia ne’e inklui tau fatuk dahuluk no asina kontratu ba ezekusaun obra ne’e. 

Iha ninia diskursu, Primeiru-Ministru destaka papél infraestrutura estrada no ponte nian hodi hadi’a asesu populasaun nian ba servisus públikus, merkadu, edukasaun, no saúde, tuir prioridade sira ne’ebé estabelese ona iha Planu Estratéjiku Dezenvolvimentu 2011–2030.

“Infraestrutura bázika importante tebes ba ekonomia, edukasaun, no saúde. Tanba ne’e maka Governu iha obrigasaun atu kria infraestrutura bázika atu nune’e povu bele hetan asesu ne’ebé  di’ak ba edukasaun no saúde”, dehan Xefe Governu.

Kay Rala Xanana Gusmão salienta mós katak estrada ne’e hein katak bele fasilita sirkulasaun populasaun nian no transporte produtu lokál, ne’ebé fó impaktu iha asesu ba merkadu no atividades ekonómikas munisípiu ne’e nian.

Primeiru-Ministru apela ba kompañia ne’ebé responsavel ba projetu ne’e atu kumpre padraun kualidade no prazu ne’ebé hatuur ona iha kontratu no husu mós kooperasaun komunidade sira nian durante períodu konstrusaun. Nia mós fó hanoin ba sira katak rekursus ne’ebé aloka ba obra  ne’e nu’udar rekursus públikus no tenke uza hodi fó benefísiu ba populasaun.

Ministru Obras Públikas, Samuel Marçal, esplika katak preparasaun ba tipu projetu ida-ne’e liuhosi etapa oioin molok hahú obra ne’e, inklui estudus, elaborasaun projetu no prosesu aprovizionamentu.

Asinatura públika ba kontratu ne’e ho objetivu mós atu reforsa responsabilidade hosi entidade sira ne’ebé envolve iha ezekusaun no fiskalizasaun ba obra ne’e. Ministru Obras Públikas apela ba empreza, ekipa téknika sira no entidades supervizór sira atu garante kumprimentu ba  espesifikasaun sira ne’ebé hatuur ona iha projetu no mós durabilidade (rezisténsia) infraestrutura ne’e nian.

Prezidente Autoridade Munisípiu Ermera, José Martinho dos Santos Soares, destaka impaktu ne’ebé hein husi estrada ne’e kona-ba ligasaun komunidade sira ba servisu, sentru urbanu, no merkadu sira, liuliu tanba kontribuisaun hosi produsaun agríkola ne’ebé boot iha munisípiu ne’e, inklui kafé, ortikultura, no produtu lokál sira seluk.

Autoridade Munisipál ne’e mós husu atu kumpre espesifikasaun téknika sira no normas seguransa nian, ho atensaun liuliu ba kualidade materiál sira, sistema drenajen, protesaun foho-lolon sira no pontu sira seluk ne’ebé risku, no mós seguransa ba utilizadór sira durante hala’o serbisu sira.

Responsavel ba empreza konstrusaun nian kompromete ona atu ezekuta obra ne’e tuir prazu kontratuál iha loron 365 nia laran no tuir rekizitus kualidade nian ne’ebé estabelese ona.

Serimónia ne’e konta mós ho partisipasaun husi membrus Governu no Parlamentu Nasionál, reprezentantes instituisaun defeza no seguransa, autoridade munisipál no lokál sira, reprezentantes hosi Igreja Katólika, lider komunitáriu sira, estudantes, no mós membru komunidade Ermera sira.