IV GOVERNO CONSTITUCIONAL
SECRETARIA DE ESTADO DO CONSELHO DE MINISTROS
……………………………………………………………………………………………………………………………
KOMUNIKADU IMPRENSA
Sorumutu Konsellu Ministru loron 8 fulan Juñu tinan 2011
Konsellu Ministru hala’o sorumutu iha kuarta-feira, loron 8 fulan Juñu tinan 2011, iha Sala Sorumutu Konsellu Ministru, iha Palásiu Governu, iha Díli, no aprova ona:
1.Dekretu Governu ne’ebé aprova Regulamentu Medalla Seguransa Públika
Diploma ida ne’e regula kriasaun ida ba kondekorasaun hirak ne’ebé hanesan símbulu gratidaun ba elementu sira Polísia Nasionál Timor-Leste nian, ne’ebé iha sira nia atividade profisionál, ka iha lala’ok ne’ebé derrepente aten barani ka laran di’ak nian, fó ona sira nia kontribuisaun signifikativa ba benefísiu Timor-Leste no timor oan sira nian.
2.Dekretu Governu ne’ebé aprova Medalla Komemorativa ba Komisaun Servisu Espesiál
Ho Dekretu ida ne’e, determina kriasaun ba kondekorasaun ida, hanesan símbolu rekoñesimentu ba elementu Polísia Nasionál Timor-Leste ne’ebé, iha sira nia atividade profisionál, kumpri sira nia misaun iha estranjeiru, hodi nune’e kontribui, ho forma jerál atu halo projesaun ba ninia instituisaun, liu-liu ba imajén disponibilidade no solidariedade, ne’ebé Timor-Leste iha ba mundu hirak seluk.
3.Dektretu-Lei ne’ebé aprova Alterasaun Rejime Promosaun ba Polísia Nasionál Timor-Leste nian
Hala’o prosesu promosaun ba Polísia Nasionál Timor-Leste (PNTL) foin lalais ne’e, seidauk bele prenxe postu oin-oin ne’bé sei mamuk hela.
Tanba iha konsiderasaun ba membru balun instituisaun nian, ne’ebé seidauk hetan rekoñesimentu ba sira nia estatutu Kombatente Libertasaun Nasionál, no sira mós okupa pozisaun komandu iha Frente Armada, Konsellu Ministrus deside altera diploma ida ne’e. Alterasaun ida ne’e regula promosaun ba membru sira PNTL nian ne’ebé hetan estatutu Kombatente Libertasaun Nasionál.
Tanba iha konsiderasaun mós katak, husi Komandu Jerál PNTL no husi Komisaun Akompañamentu ba Prosesu Promosaun PNTL nian, dezenvove daudaun ona no presiza iha kontinuidade, Governu deside atu aumenta tan períudu tranzitóriu.
4.Rezolusaun Governu nian ba Nomeasaun membru Komisaun Akompañamentu ba prosesu Promosaun PNTL nian
Tuir mandatu Komisaun Akompañamentu ba Prosesu Promosaun Polísia Nasionál Timor Leste (PNTL) nian ne’ebé foin lalais ne’e hanaruk tan, presiza haree fila fali nia kompozisaun.
Nune’e, membru sira ne’ebé hetan nomeasaun atu halo parte iha Komisaun mak hanesan:
1 – Isabel Ferreira ( Prezidente)
2 – Madre Guilhermina Marçal (Vogál
3 – Dr.Anacleto da Costa Ribeiro (Vogál)
4 – Komisáriu Afonso de Jesus, 2.o Komandante Jerál (Vogál)
5 – Superintendente Eugéniu Pereira (Vogál)
6 – Superintendente Arquimíno Ramos (Vogál)
7 – Tânia Felicio, UNMIT (Vogál)
Hanesan membru suplente, mak:
1 – Cândida do Rosário,Sekretáeia Estadu Seguransa
2 – Superintendente Asistente Moisés Amaral, PNTL
3 – Subintendente Raul Curva, UNMIT.
5.Dekretu Lei kona-ba Primeira Alterasaun Lei Orgánika Sekretaria Estadu Juventude no Desportu
Ho objetivu atu halo di’ak liután supervizaun ba atividade Sekretaria Estadu Juventude no Desportu (SEJD), mak harii ona Gabinete Inspesaun no Auditória Interna, iha autonomía téknika no administrativa no ho kompeténsia iha ámbitu avaliasaun no fiskalizasaun ba atividade hirak ne’ebé mak atu implementa.
Konsellu Ministru analiza mós:
1.Zona Ekonómika Espesiál
Konsellu Ministru analiza estudu ne’ebé aprezenta husi empreza DLA PIPER, kona-ba kriasaun Zona Ekonómika Espesiál, hodi esplika kona-ba Zona ne’e, tipu oioin ne’ebé mak eziste, kondisaun ne’ebé mak presiza ba implementasaun, vantájen no desvantájen no pasu ne’ebé mak presiza ba nia kriasaun.Aprezenta ona ezemplu oioin kona-ba Zona Ekonómika Espesiál, ne’ebé harii ona iha fatin oin-oin iha mundu.
2.Banku Nasionál Investimentu no Dezenvolvimentu Timor-Leste nian
Nu’udar atu kria Banku Nasionál no Dezenvolvimentu Timor Leste nian ne’ebé la’o hela, Ministériu Ekonomía no Dezenvolvimentu aprezenta ona ba Konsellu Ministru, kondisaun subskrisaun nian ne’ebé loke ba sira ne’ebé atu sai asionista.
Prosesu formál ba konstituisaun Banku Nasionál Investimentu no Dezenvolvimentu Timor-Leste nian, nu’udar hotu-hotu hatene katak, hahú ho aprovasaun husi Konsellu Minsitru, Rezolusaun kona-ba planu asaun ba kriasaun Banku nian. Rezolusaun hetan ona aprovasaun iha Sorumutu Estraordináriu iha loron 11 fulan Maiu tinan 2010, no determina estrutura jerál ba instituisaun iha tempu oin mai.
3.Projetu Investimentu “ “Ótel Timor”
Konsellu Ministru analiza ona projetu investimentu ba “ Ótel Timor”, iha Dili. Diskute ona kondisaun proposta ne’ebé aprezenta husi empreza ne’eb’e ka’er servisu otél ne’e nian no analiza ona posibilidade ba estensaun kontratu konsesaun liu husi investimentu empreza hodi haboot tan otél.
4.Dekretu Lei kona-ba Regulamentu Hasa’e Bandeira Nasionál nian
Bandeira Nasionál mak símbolu ida unifikadór Pátria nian, ne’ebe’ tenke hasa’e nia dignidade aas liu , nune’e mós, timor oan sira hotu-hotu tenke hatudu sira nia respeitu ba bandeira ne’e.
Rekoñese katak lejislasaun kona-ba Bandeira Nasionál seidauk kompleta, Konsellu Ministru analiza ona diploma ne’e, ne’ebé mak estabelese regra jerál hodi regula atu hasa’e bandeira iha loron ne’ebé mak lei determina.