Sorumutu Konsellu Ministrus loron 11 fulan-setembru tinan 2026

Konsellu Ministrus hala’o sorumutu iha Palásiu Governu, Dili, no aprova projetu Dekretu-Lei, ne’ebé aprezenta hosi Ministru Prezidénsia Konsellu Ministrus, Agio Pereira, no Prezidente Komisaun Funsaun Públika (CFP, sigla iha lian portugés), Agostinho Letêncio de Deus, kona-ba Progresaun Estraordinária ba Pesoál Karreira iha Rejime Jerál Administrasaun Públika nian.

Diploma ne’e estabelese rejime progresaun eskalaun estraordináriu ba funsionáriu sira ne’ebé integra iha karreira Rejime Jerál Administrasaun Públika, ho objetivu atu hasa’e motivasaun, valorizasaun profisionál, no hadi’a dezempeñu funsionárius públikus nian, ho hanoin atu hametin efisiénsia no kualidade prestasaun servisu husi instituisaun sira Administrasaun Públika nian.

Tuir rejime ida-ne’e, funsionáriu sira ne’ebé integra iha grau D to’o A sei hetan benefísiu hosi progresaun eskalaun ida, enkuantu funsionáriu sira hosi grau G to’o E sei hetan benefísiu hosi progresaun eskalaun rua, ho exesaun ba sira ne’ebé iha eskalaun penúltimu, ne’ebé sei hetan atribuisaun ba progresaun eskalaun ida.

Rejime ne’e la abranje funsionáriu públiku sira ne’ebé iha hela períodu probatóriu, sira ne’ebé kumpre hela pena suspensaun disiplinár ka inatividade, sira ne’ebé iha hela lisensa sein vensimentu, sira ne’ebé hetan klasifikasaun ida ne’ebé ki’ik liu hosi “Bom” iha avaliasaun dezempeñu ikus nian, no sira ne’ebé iha ona eskalaun ikus hosi sira-nia grau ida-idak. Funsionáriu públiku sira ne’ebé iha 2026 inklui iha rejime promosaun karreira jerál nian hosi Administrasaun Públika, la bele mós hetan benefísiu ba progresaun ida-ne’e.

Progresaun estraordináriu ne’ebé prevee iha diploma ida-ne’e prodús efeitu retroativu hahú hosi loron 1 fulan-agostu tinan 2026.

****

Aprova mós projetu Dekretu Governu nian, ne’ebé aprezenta hosi Ministru Administrasaun Estatál, Tomás do Rosário Cabral, ne’ebé aprova kalendáriu resenseamentu eleitorál iha estranjeiru, iha ámbitu preparasaun ba eleisaun prezidensiál 2027 nian.

Diploma ne’e estabelese katak operasaun rejistu no atualizasaun resenseamentu eleitorál nian iha estranjeiru sei hala’o hosi loron 8 fulan-outubru 2026 to’o 22 fulan-janeiru 2027, ho reforsu hosi rekursus materiais no umanus iha misaun diplomátiku prinsipál no mós postu konsulár sira no posibilidade instalasaun postu móvel sira. Períodu ne’ebé naruk ho objetivu mós atu permite atualizasaun dadus eleitór sira-nian ba sistema biométriku ne’ebé foun no mós fasilita ezersísiu direitu votu hosi sidadaun timoroan sira ne’ebé hela iha estranjeiru.

****

Tuir aprezentasaun husi Ministru Obras Públikas, Samuel Marçal, Konsellu Ministrus delibera hodi autoriza despeza no abertura prosedimentu aprovizionamentu nian ba konstrusaun no instalasaun Sistema Fornesimentu Enerjia Íbridu iha illa Ataúro, ho valór estimadu dolar amerikanu millaun 13,5.

Projetu ne’e prevee instalasaun sistema ida ne’ebé kombina enerjia solar fotovoltáiku, armazenamentu iha baterias no jeradór diesel modernu sira, ho objetivu atu garante fornesimentu eletrisidade ida ne’ebé estavel no efisiente liu iha oras 24 nia laran, hodi hamenus kustu produsaun no kontribui ba dezenvolvimentu illa nian no hadi’a kondisaun moris populasaun nian.

****

Konsellu Ministrus aprova mós projetu Rezolusaun Governu nian, ne’ebé aprezenta hosi Ministru Justisa, Sérgio de Jesus Fernandes da Costa Hornai, ba ezonerasaun Alexandre Gentil Corte-Real de Araújo no nomeasaun Nelinho Vital ba ninia substituisaun, hodi hala’o kna’ar nu’udar vogál efetivu Governu nian iha Konsellu Superiór Majistratura Judisiál, ba mandatu tinan haat.

Konsellu ida-ne’e nia kompeténsia atu jere no haree ba dixiplina hosi atividade majistradu judisiál sira-nian no mós nomeasaun, kolokasaun, transferénsia no promosaun juis sira iha Timor-Leste. Konsellu Superiór Majistratura Judisiál prezide hosi Juis Prezidente Supremu Tribunál Justisa no kompostu hosi vogál na’in-haat, ida Governu maka nomeia.

****

Ministru Sérgio de Jesus Fernandes da Costa Hornai informa ba Konsellu Ministrus kona-ba prosesu renovasaun pasaporte ba sidadaun timoroan sira ne’ebé hela no servisu iha Israel, hala’o ba dala uluk diretamente iha nasaun ne’ebá, iha koordenasaun ho Ministériu Negósius Estranjeirus no Kooperasaun. Konsellu Ministrus haree mós vídeo ida ne’ebé haruka hosi komunidade timoroan iha Israel, iha ne’ebé sira hato’o agradesimentu ba Governu ba inisiativa ne’e, ne’ebé fasilita asesu ba renovasaun dokumentu viajen nian no evita nesesidade atu halo viajen ba nasaun sira seluk ba objetivu ne’e. REMATA