Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, lidera delegasaun Timor-Leste iha Forum Pre-Simeira kona-ba Perspetiva no Kooperasaun Estratéjika Akordu-Kuadru Ekonomia Dijitál ASEAN (DEFA), ne’ebé hala’o iha loron 7 fulan-setembru tinan 2026, iha Hong Kong, Xina. 
Forum ne’e organiza hosi Sentru Ekonómiku no Komersiál ASEAN–Hong Kong (AHKETC), halibur reprezentante governu sira, autoridades, espesialistas, instituisaun finanseira sira, no reprezentantes hosi setór privadu atu analiza perspetiva ba implementasaun DEFA no mós oportunidades atu aprofunda integrasaun ekonómika dijitál iha rejiaun ne’e.
Sesaun ne’e konta mós intervensaun husi Sekretáriu-Jerál ASEAN, Kao Kim Hourn, ne’ebé aprezenta vizaun ASEAN nian ba integrasaun rejionál no destaka DEFA hanesan instrumentu ida ba transformasaun dijitál iha rejiaun ne’e. Tuir projesaun ne’ebé aprezenta ona, implementasaun akordu ne’e bele kontribui ba ekonomia dijitál ASEAN nian atinje valór to’o dolar amerikanu triliaun rua to’o tinan 2030.
Diskusaun sira ne’e foka liu ba área prinsipál rua: harii arkitetura operasionál ida ba ekonomia dijitál ASEAN nian ida ne’ebé integradu no dezenvolve infraestrutura dijitál sira ne’ebé konfiavel hodi apoia atividade ekonómika rejionál. Ko’alia tema sira hanesan komérsiu dijitál, pagamentu transfronteirisu, fluksu dadus, teknolojia finanseira, seguransa online, siberseguransa no teknolojia dijitál foun, inklui intelijénsia artifisiál.
Forum ne’e analiza mós posibilidade ba kooperasaun entre ASEAN no Hong Kong iha ámbitu DEFA, liuliu atu reforsa interoperabilidade sistema dijitál no finanseiru nian no mós fasilita komérsiu eletróniku, no dijitál no mós fluksu dadus entre ekonomia rua ne’e.
Delegasaun nasionál ne’e inklui Governadór Banku Sentrál Timor-Leste, Hélder Lopes, no mós membrus Governu no Parlamentu Nasionál. Governador ne’e partisipa mós iha painél ida ne’ebé ko’alia kona-ba harii rede finanseira dijitál entre banku no merkadu, no mós mekanizmu atu halo pagamentu no tranzasaun transfronteirisa sai efisiente liután.