Sekretáriu Estadu Polítika Enerjétika, Avelino Coelho, asiina ona akordu 23 ho xefe suku sira hodi implementa unidade fotovoltaika sira (painél solár sira) iha distritu neen Timor-Leste nian, iha loron 27 fulan Maiu 2011.

Husi akordu hirak ne’ebé mak asina tiha ona, 12 hanesan kontinuasaun ba projetu hirak ne’ebé mak hahú tiha ona, no 11 atu hodi implementa ba projetu iha zona foun sira atu nune’e bele haluan planu Sekretaria Estadu Polítika Enerjétika (SEPE) nian kona-ba eletrifikasaun iha zona rurál sira liu hosi enerjia alternativa no renovável sira. Suku foun 11 ne’ebé mak asina tiha ona akordu ho SEPE mak: Ailelo, Atabae, Beremana, Foholau, Humboe, Lesuata, Manlala, Matorek, Orana, Samara no Tibar.

Aleinde akordu hirak ne’e, asina mós akordu seluk ida hodi implementa projetu-pilotu sentrál solár komunitária nian ida iha suku Mertutu (sub-distritu no distritu Ermera) ho kapasidade KW 2. Ho forma ida ne’e, SEPE kontinua promove utilizasaun enerjia renovável sira nu’udar alternativa ba eletrifikasaun iha área rurál sira, hodi kontribui ba promosaun kresimentu ekonómiku no hamenus nível ki’ak nian iha zona hirak ne’ebé sai nu’udar alvu ba projetu hirak ne’e.