Ministru Prezidénsia Konsellu Ministrus, Agio Pereira, ohin, loron 8 fulan-setembru tinan 2026, iha Palásiu Governu, simu Reprezentante foun Banku Aziátiku Dezenvolvimentu (ADB) nian iha Timor-Leste, Artur Andrysiak, ba enkontru kortezia ida ne’ebé foka ba prioridade nasionál sira dezenvolvimentu nian no área kooperasaun sira entre Governu no ADB. 

Durante sorumutu ne’e, Ministru Agio Pereira destaka diversifikasaun ekonómika nu’udar prioridade ida Governu Konstitusionál IX nian no aborda dezafiu sira ne’ebé relasiona ho integrasaun plena Timor-Leste nian iha ASEAN no mós preparasaun nasionál atu asume Prezidénsia organizasaun rejionál ne’e iha 2029. 

Iha kontestu ida-ne’e, ko’alia kona-ba nesesidade atu asegura konkluzaun pontuál ba obra sira iha Aeroportu Internasionál Prezidente Nicolau Lobato no reforsa kondisaun sira ne’ebé presiza atu simu sorumutu no delegasaun sira ne’ebé prevee ona durante Prezidénsia ASEAN. Parte sira analiza mós prioridade seluk ba dezenvolvimentu, inklui konektividade no infraestrutura sira, dezenvolvimentu Kosta Súl no Greater Sunrise, no mós edukasaun no formasaun profisionál.

Artur Andrysiak reafirma ADB nia disponibilidade atu kontinua apoia prioridade sira Timor-Leste nian, liuhusi asisténsia téknika no finanseira, liuliu iha área infraestrutura no transporte, diversifikasaun ekonómika, edukasaun, saúde, no mós preparasaun ba Prezidénsia ASEAN.

Enkontru ne’e permite mós atu analiza projetu sira ne’ebé la’o hela ho apoiu husi ADB, ne’ebé abranje área oioin, hanesan rekuperasaun ekonómika, reziliénsia klimátika, infraestrutura no servisu báziku sira, konektividade, no mós diversifikasaun ekonómika.

Ikusliu, parte rua manifesta intensaun atu mantein koordenasaun ne’ebé metin hodi identifika área prioritária sira ba kooperasaun entre Governu no Banku Aziátiku Dezenvolvimentu.