Ministru Negósiu Estranjeiru, Zacarias Albano da Costa, husu ba Movimentu Rain La’ós-Aliñadu sira (Movimento dos Países Não-Alinhados MNA) atu fó moris foun fali ba organizasaun, ho objetivu atu hatán ho forma efikáz ba dezafiu globál sira ohin loron nian.

Iha ninia diskursu iha Bali, ne’ebé nia partisipa iha Konferénsia Ministeriál Movimentu Rain La’ós Aliñadu sira, ministru haktuir: “Atu fó moris foun fali ba MNA, ita tenke haree ba buat rua: ninia prinsípiu fundadór sira no realidade sira ohin loron nian. Ita tenke haree mós ba área hirak ne’ebé importante ba ita nia dezenvolvimentu iha komunidade internasionál. Diálogu konstrutivu entre Estadu sira ne’ebé buka objetivu hirak ne’ebé ita iha, importante atu hasoru dezafiu oioin. Diálogu ida ne’e tenkesér iha fundamentu iha vizaun responsabilidade ida ne’ebé fahe ba hotu-hotu, no tenke bazeia iha respeitu ba propriedade nasionál”.

Zacarias Albano da Costa ko’alia mós kona-ba importánsia atu kapasita no dudu feto no foin-sa’e sira hodi realsa efeitu a’as ne’ebé eziste iha sosiedade: “Prinsípiu sira Bandung nian tenke sai hanesan katalizadór iha sentidu ida ne’e.  Bainhira rekoñese igualdade nasaun, rasa no povu sira nian, importante atu realsa mós nesesidade atu kapasita feto no foin-sa’e sira. Igualdade Jéneru nian no fó kbiit ne’ebé barak liután ba feto sira importante tebes ba dezenvolvimentu sustentável ba ita nia nasaun sira.””

Ministru Negóssiu Estranjeiru ko’alia kompromisu Timor-Leste nian kona-ba Direitu Umanu, Demokrasia no Estadu Direitu nian, hodi bolu liu atensaun ba situasaun susar husi povu Sara Loro-monu no Palestina nian no kona-ba sira nia direitu ba autodeterminasaun.

Timor-Leste adere ba MNA  iha tinan 2003, no ohin loron movimentu ida ne’e konta ho membru hamutuk 118 maibé iha sorumutu ida ne’e bele halo aprovasaun ba adezaun país balun tan: Azerbaizaun no illa sira Fiji nian.