Governu Timor-Leste no Austrália, hamutuk ho Property Council of Australia NT, fó-sai parseria ida hodi realiza programa emprezariál ida durante loron haat iha Dili, hahú hosi loron 27 to’o loron 30 fulan-outubru, ne’ebé ho objetivu atu hakbesik emprezas no governus Timor-Leste no Austrália nian.

Programa hamutuk ne’e sei hanaran Simeira Negósius no Investimentu hosi Darwin ba Dili no Invest Timor-Leste 2026.

Invest Timor-Leste 2026 hetan apoiu hosi Governu Austrália, iha parseria ho Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente Timor-Leste, TradeInvest Timor-Leste no Kámara Komérsiu no Indústria Timor-Leste.

Property Council lidera Simeira Negósius no Investimentu iha tersa-feira no kuarta-feira, ne’ebé konta ho sesaun informasaun kona-ba merkadu, oradór altu nivel hosi setór relevante, no mós vizita ba empreza sira ne’ebé hala’o operasaun iha Dili. Invest Timor-Leste loke ho Jantár Gala iha kuarta-feira kalan no Forum Emprezariál Invest Timor-Leste iha kinta-feira.

Forum Emprezariál Invest Timor-Leste sei halibur delegadu australianu sira no empreza timoroan sira liuhosi enkontrus negósius estruturadus (B2B), no mós ho omólogu sira Governu Timor-Leste nian, hodi ko’alia kona-ba oportunidades iha futuru no ambiente investimentu ne’ebé konduzivu.

Programa ne’e hahú kuaze ezatu tinan ida hafoin adezaun Timor-Leste nian ba ASEAN iha loron 26 fulan-outubru tinan 2025. Timor-Leste sei asume prezidénsia ASEAN nian iha tinan 2029.

Diretora Ezekutiva Property Council NT nian, Ruth Palmer, hatete katak programa ne’e kria atu prodús rezultadus.

“Ida-ne’e la’ós de’it eventu ida ba konversas. Ida-ne’e kona-ba halibur ema sira ne’ebé loos hamutuk iha sala ida de’it hodi kria kontaktu loloos, parseria loloos, no rezultadu komersiál sira ne’ebé konkretu”, dehan Ruth Palmer.

 “Austrália Norte no Timor-Leste iha jeografia, istória, no oportunidades ne’ebé hanesan. Konferénsia ida-ne’e ho objetivu atu transforma prosimidade ne’e sai parserias ne’ebé konkretus.”

Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente Timor-Leste, Sua Exelénsia Francisco Kalbuadi Lay, subliña katak programa ne’e reflete prioridade investimentu Timor-Leste nian.

 “Timor-Leste nakloke ba negósiu. Ami-nia adezaun iha ASEAN habelar ona ami-nia merkadu no hametin konfiansa iha ami-nia ekonomia, no iha tinan 2029 ami sei asume prezidénsia ASEAN nian. Austrália mak ami-nia viziñu besik no konfiavel, no parseiru naturál iha setór turizmu, agrikultura, no enerjia. Ami simu delegasaun ida-ne’e iha Dili no fó benvindu ba parseiru sira ne’ebé sériu.”

Embaixadora Austrália nian ba Timor-Leste, Caitlin Wilson, hateten katak parseria ida-ne’e reflete maturidade relasaun komersiál entre nasaun rua ne’e.

 “Austrália no Timor-Leste nu’udar viziñu besik no parseiru metin, no dimensaun komersiál husi relasaun ida ne’e buras daudaun. Governu australianu haksolok atu apoia Invest Timor-Leste 2026. Lori empreza sira besik malu, ho apoiu husi governu rua ne’e, hanesan dalan ida atu harii relasaun komersiál ne’ebé dura.”

Mobiliza hela empreza timoroan sira ne’ebé partisipa iha Forum Emprezariál Invest Timor-Leste no sesaun matchmaking ho apoiu hosi Kámara Komérsiu no Indústria Timor-Leste no TradeInvest Timor-Leste, no sei hetan benefísiu hosi programa preparasaun antes fulan-outubru.

Empreza australiana sira ne’ebé iha interese atu partisipa, halo parseria, ka patrosina eventu ne’e hetan konvite atu kontakta Property Council of Australia NT.

EVENTU

Simeira Negósius no Investimentu hosi Darwin ba Dili no Forum Emprezariál  Invest Timor-Leste 2026.

DATA

27-30 fulan-outubru 2026

FATIN

Dili, Timor-Leste

 

REJISTU

Empreza australiana sira bele rejista ba Simeira Negósius no Investimentu hosi Darwin ba Dili liuhusi site Property Council of Australia nian.

Forum Emprezariál  Invest Timor-Leste ne’e ho konvite de’it; maibé, espresaun sira interese nian bele haruka liuhosi email ba InvestTL@prosivu.tl.