Ministru Transportes no Komunikasoins no mós Prezidente hosi Conselho Geral da Cabos de Timor-Leste, EP (CTL, EP), Miguel Marques Gonçalves Manetelu akompaña hosi delegasaun nasionál ida, partisipa iha edisaun ba dala 11 hosi Bali Annual Telkom International Conference (BATIC 2026), ne’ebé hala’o hosi loron 24 to’o 28 fulan-agostu 2026, iha Sentru Konvensaun Internasionál Bali, iha Indonézia. 

Konferénsia ne’e organiza hosi Telin, subsidiáriu internasionál hosi Telkom Indonézia, hala’o ho tema “Halo-hamutuk ekosistema hodi dudu progresu interligadu” no halibur reprezentante sira hosi governus, operadór telekomunikasaun sira, emprezas teknolójikas ,no mós interveniente sira seluk iha setór dijitál hosi nasaun oioin.

Partisipasaun hosi delegasaun Timor-Leste nian permite sira akompaña dezenvolvimentu internasionál iha área konektividade, kabu fibra ótika submarinu, intelijénsia artifisiál, komputasaun iha cloud, jestaun dadus, siberseguransa, no transformasaun dijitál, no mós hala’o kontaktu ho operadór no parseiru internasionál sira iha setór telekomunikasoins nian.

Hanesan parte ida hosi konferénsia, delegasaun partisipa mós iha ignitePRO Forum, ne’ebé foka liu ba kooperasaun entre governus no setór privadu iha dezenvolvimentu telekomunikasoins no ekonomia dijitál.

Ministru Miguel Manetelu destaka oportunidade atu aprende kona-ba esperiénsia hosi nasaun sira seluk no empreza sira ne’ebé bele kontribui ba dezenvolvimentu CTL, EP, liuliu iha jestaun infraestrutura fibra ótika nasionál. Nia mensiona mós nesesidade atu kria kondisaun regulamentár adekuada ba dezenvolvimentu telekomunikasoins no mós  promove uzu responsavel hosi teknolojia foun sira, inklui intelijénsia artifisiál, ba benefísiu sosiedade no dezenvolvimentu nasionál.

BATIC 2026 mós aborda aumentu nesesidades largura banda no konektividade nian ne’ebé relasiona ho dezenvolvimentu intelijénsia artifisiál, ho énfaze ba investimentu iha kabu submarinu no sentru dadus sira, seguransa infraestrutura dijitál sira nian, no mós kooperasaun entre operadór telekomunikasaun sira, fornesedór servisu komputasaun nian iha cloud, empreza teknolojia no entidade reguladora sira.

Diretór Ezekutivu hosi Telkomcel Timor-Leste, Benedictus Ardiyanto Priyo, salienta katak partisipasaun iha BATIC nu’udar oportunidade ida ba Timor-Leste no CTL, EP atu estabelese kontaktu ho operadór globál no empreza teknolójika sira, hodi destaka papél konektividade nian iha promosaun ekonomia dijitál no hadi’a servisus telekomunikasoins iha nasaun ne’e.

Delegasaun ne’e inklui mós Koordenadór-Jerál CTL, E.P., Pedro Lay, Diretór-Jerál Komunikasaun, Ambrósio Amaral, no Diretór Diresaun Nasionál Infraestrutura Komunikasoins nian, Pedro Amaral.