Dili – Ohin, loron 11 fulan-Agostu 2026, , Epizódiu foun husi programa TV “Página do Governo” ne’ebé grava ona iha Palásiu Governu Dili, hamutuk ho Sekretáriu Estadu Protesaun Sivíl, Domingos Mariano Reis. Entrevista ne’e foka liu ba prioridade sira husi Governu nian ba reforsa protesaun sivíl, jestaun risku dezastre, preparasaun ba emerjénsia, koordenasaun institusionál, no proteje komunidade sira iha Pais laran tomak. 

Iha entrevista ne’e, Sekretáriu Estadu destaka kompromisu Governu nian atu hasa’e kapasidade nasaun nian atu prevene, prepara ba, responde, no rekupera husi dezastre naturál no emerjénsia sira seluk liuhosi polítika públika ne’ebé efetivu, koordenasaun institusionál ne’ebé forte liu, no reziliénsia komunidade nian. 

Duarente sesaun entrevista ne’e, ko’alia kona-ba importánsia atu hadi’a preparasaun nasionál ba dezastre, reforsa mekanizmu resposta emerjénsia, no hametin kooperasaun entre instituisaun governu sentrál, autoridade munisípiu sira, forsa seguransa, no parseiru umanitáriu sira hodi garante asaun ne’ebé lalais no koordenadu bainhira de’it mosu situasaun emerjénsia. 

Sekretáriu Estadu mós subliña nesesidade atu habelar inisiativa redusaun risku dezastre, promove kampaña sensibilizasaun públiku, no hadi’a sistema alerta sedu atu proteje di’ak liután vida, propriedade, no infraestrutura krítiku sira hosi perigu naturál sira, inklui inundasaun, rai-halai, rai-maran, no eventu sira seluk ne’ebé relasiona ho klima. 

Entrevista ne’e mós destaka serbisu hamutuk no mantein kria koordenasaun diak ho ministériu relevante sira no instituisaun públika sira hodi asegura katak polítika protesaun sivíl sira integradu iha planeamentu dezenvolvimentu nasionál enkuantu promove aprosimasaun komprensivu ida ba jestaun risku dezastre nian iha setór hotu-hotu. 

Programa “Página do Governo” promove hosi Gabinete Portavós Governu, ne’ebé lidera hosi Ministru Prezidénsia Konsellu Ministrus, Agio Pereira, programa ne’e prodús iha parseira ho RTTL no mídia nasionál sira, ho objetivu atu reforsa transparénsia governativa, prestasaun kontas no asesu sidadaun sira nian ba informasaun kona-ba desizaun no polítika públika prinsipál Ezekutivu nian.

Programa ne’e, konta ho Nélia Chaves nu’udar entrevistadora no ho Ika Moniz hanesan produtora ezekutiva, ne’ebé sai hanesan espasu ida ba diálogu institusionál, ne’ebé foka liu ba interese públiku. Programa “Página do Governo” ne’e grava hosi RTTL, no mós hetan apoiu tékniku hosi ekipa mídia Gabinete Primeiru-Ministru, Prezidénsia Konsellu Ministrus, no gabinete hosi membru Governu ne’ebé hetan entrevista.
Epizódiu ne’ebé konta ho Sekretáriu Estadu Protesaun Sivíl sei fó sai iha tempu badak iha RTTL no liuhosi plataforma ofisiál sira mídia sosiál Governu nian.