Dili, loron 7 fulan-agostu tinan 2026 – Governu Timor-Leste, liuhusi Prezidénsia Konsellu Ministrus (PCM, sigla iha lian portugés), ohin hasoru malu ho reprezentante sira husi Gabinete Prezidente Repúblika no Governu Austrália hodi diskute kona-ba dezenvolvimentu ba futuru Memorial INTERFET nian iha Dili. 

Sorumutu ne’e konta ho prezensa hosi reprezentantes Governu Timor-Leste, Gabinete Prezidente Repúblika, ne’ebé reprezenta hosi Embaixadór Vicky no Nelson Santos, no Governu Austrália nian, ne’ebé reprezenta hosi Sua Exelénsia Embaixadora Caitlin Wilson.

Sorumutu ne’e foka liu ba hametin kooperasaun ba dezenvolvimentu memoriál, iha ne’ebé Governu reafirma ninia kompromisu ba prezervasaun legadu hosi Forsa Internasionál ba Timor-Leste (INTERFET) no hodi garante katak memoriál ne’e reflete istória hamutuk no kontribuisaun hosi Timor-Leste, Austrália, Nova Zelándia, no mós país sira seluk ne’ebé partisipa ona iha misaun internasionál ba manutensaun pás.

Governu, hamutuk ho Gabinete Prezidente Repúblika nian, identifika ona antigu elikópteru INTERFET, ne’ebé iha Palásiu Prezidensiál Nicolau Lobato nia sorin, nu’udar fatin ba futuru memoriál. Serimónia fó bénsaun ba fatin ne’ebé propoin ba Memoriál no Muzeu Internasionál Manutensaun Pás ne’e hala’o iha loron 14 fulan-setembru tinan 2024, hodi marka aniversáriu ba da-25 hosi destakamentu INTERFET nian.

Durante reuniaun ne’e, Governu ko’alia mós kona-ba kalendáriu implementasaun ne’ebé propoin no dezignasaun ba pontus fokais téknikus husi parte Timor-Leste nian. Ministru subliña katak memoriál ne’e la bele sai de’it monumentu ida pasadu nian, maibé tenke sai nu’udar espasu edukativu ida ba jerasaun sira iha futuru, hodi promove valór pás, solidariedade no kooperasaun internasionál.

Ministru Agio destaka mós importánsia atu dezenvolve memoriál ne’e nu’udar legadu ida ne’ebé hamutuk ba Timor-Leste, Austrália, Nova Zelándia no nasaun hotu-hotu ne’ebé kontribui ona ba INTERFET, no iha tempu hanesan hodi garante katak projetu ne’e kumpre norma internasionál no fó onra tantu ba povu timoroan no mós pesoál ne’ebé servisu iha INTERFET.