Sekretáriu Estadu Juventude Desportu (SEJD), Miguel Manetelo akompaña Vice-Primeiru-Ministru José Luis Guterres, hodi loke torneiru nasionál entre arte marsiál iha salaun Jináziu Dili, loron 24 fulan Maiu.

Vice-Primeiru-Ministru, José Luis Guterres, iha ninia intervensaun kongratula partisipante hosi membru arte marsiál tomak hodi hametin nafatin páz no unidade iha organizasuan nia laran. Juramentu jerál ne’ebé foin lalais arte marsiál no ritual halo nu’udar kompromisu atu hametin estabilidade seguransa Timor-Leste. Governu liu hosi, SEDJ sei tau matan nafatin ba problema ne’ebé arte marsiál sira hala’o iha Timor-Leste hodi bele fó kontribuisaun mós ba dezenvolvimentu Nasaun nian.

Nune’e mós Prezidente FESTIL, Aniceto Guru Bertene hateten katak, objetivu prinsipál husi jogu ne’ebé sira nia parte organiza mak atu prepara membru arte marsiál ne’ebé manán sei partisipa iha Asia Games. “Kompetisaun ne’e hala’o ho objetivu tolu: primeiru atu fortifika juramentu ne’ebé arte marsiál no rituál sira halo, segundu halo kompetisaun ba arte marsiál nu’udar organizasaun desportivu no terseiru atu prepara membru arte marsiál sira ne’ebé manán iha kompetisaun ne’e sei partisipa iha jogu Asia Games iha Indonezia.

Federasaun 5 nebe partisipa iha kompetisaun ne’e mak Federasaun Karaté, Kempo Timor-Leste, Taekwondo, Federasaun Pencak Silat Timor-Leste no Ukido. Kompetisaun ne’e rasik sei remata iha loron 10 fulan Juñu 2011.