Dili, 28 Jullu 2026 – Vise-Ministru Komérsiu partisipa ohin loron, 28-Jullu-2026, iha gravasaun epizódiu foun ida hosi programa “Página do Governo”, iha ne’ebé nia ko’alia kona-ba prioridade sira Governu nian no medida sira ne’ebé la’o hela hodi hametin setór komersiál, apoia dezenvolvimentu privadu, promove ekonomia sustentável kresimentu iha Timor-Leste. 

Durante entrevista, Vise-Ministru esplika katak prioridade prinsipál Governu nian ba setór komersiál mak atu asegura disponibilidade sasán esensiál, hametin sistema merkadu, promove kompetisaun ne’ebé justu, apoia produsaun lokál, no kria ambiente negósiu ne’ebé favoravel. Prioridade sira-ne’e implementa daudaun liuhosi reforma institusionál sira, hadi’a koordenasaun entre ajénsia relevante sira, no envolvimentu kontínuu ho setór privadu. 

Transformasaun dijitál mós halo parte iha ajenda modernizasaun Ministériu nian. Vise-Ministru ne’e esplika, esforsu hala’o hela atu habelar servisu públiku dijitál sira, inklui lisensiamentu negósiu online, hadi’a sistema informasaun merkadu nian, no plataforma dijitál sira ne’ebé fasilita asesu ba informasaun ba emprezáriu no investidór sira. 

Hakotu entrevista, Vise-Ministru enkoraja emprezáriu no operadór emprezariál sira atu kontinua investe, halo inovasaun no kumpre regulamentu nasionál. Nia reafirma, Governu iha nafatin kompromisu atu servisu iha parseria ho setór privadu hodi harii ekonomia ida ne’ebé forte liu, kompetitivu no inkluzivu liu ne’ebé kria oportunidade empregu no kontribui ba dezenvolvimentu parte industrial no sustentável Timor-Leste nian. 

Programa “Página do Governo’’ lidera hosi Ministru Prezidénsia Konsellu Ministrus, Agio Pereira, programa ne’e prodús iha parseira ho Rádiu no Televizaun Timor-Leste (RTTL) no mós mídia nasionál sira, ho objetivu atu reforsa transparénsia governativa, prestasaun kontas no asesu sidadaun sira nian ba informasaun kona-ba desizaun no polítika prinsipál sira Ezekutivu nian.

“Página do Governo”, ho Nélia Chaves hanesan entrevistadora no Ika Moniz hanesan produtora ezekutivu, sai hanesan espasu ida ba diálogu institusionál, ne’ebé foka liu ba interese públiku, atu bele garante  populasaun nia asesu ba asaun no desizaun prinsipál sira Ezekutivu nian. Programa ne’ebé grava hosi RTTL, hetan mós apoiu tékniku hosi ekipa mídia Gabinete Primeiru-Ministru, Prezidénsia Konsellu Ministrus, no hosi gabinete membru governu ne’ebé hetan entrevista. 

Epizódiu ne’ebé konta ho Vise-Ministru Komérsiu ne’e sei fó sai iha tempu badak iha RTTL no iha plataforma ofisiál mídia sosiál Governu nian.