Sekretáriu Estadu Peskas, Domingos da Conceição dos Santos, partisipa ohin, loron 23 fulan-jullu tinan 2026, iha gravasaun epizódiu foun ida hosi programa “Página do Governo”, ne’ebé intervista ho Sekretáriu Estadu Peskas. Diskusaun ne’e foka liu ba estratéjia Governu nian atu dezenvolve setór peskas Timor-Leste nu’udar pilar xave ba diversifikasaun ekonómika, seguransa ai-han, no dezenvolvimentu nasionál ne’ebé sustentável. 

Durante entrevista ne’e, Sekretáriu Estadu destaka vizaun Governu nian kona-ba transforma rekursu tasi Timor-Leste nian ne’ebé riku ba iha setór ekonómiku estratéjiku ida ne’ebé bele hamosu empregu, hasa’e rendimentu uma-kain nian, hametin seguransa ai-han, no habelar oportunidade esportasaun enkuantu garante jestaun sustentável ba ekosistema tasi nian. 

Membru Governu ne’e, afirma katak hametin hela patrullamentu marítima no vijilánsia iha Zona Ekonómika Eskluziva (ZEE) Timor-Leste nian tomak hodi kombate peska ilegál, partikularmente hosi ró estranjeiru sira. Hasa’e mós koordenasaun entre Polísia Marítima, Autoridade Marítima Nasionál, no instituisaun relevante sira seluk, enkuantu habelar kooperasaun ho parseiru rejionál no internasionál sira. Medida sira ne’e ho objetivu atu proteje rekursu tasi nasaun nian, salvaguarda soberania nasionál, no garante sustentabilidade meius subsisténsia ba komunidade peskadór lokál sira.

Diskusaun konklui ho vizaun jerál ida kona-ba reforma sira ne’ebé planeadu ba lisensiamentu peska komersiál, hodi asegura katak rekursu tasi nian sira hetan esplorasaun ho responsabilidade no sustentável iha médiu no longu prazu. Governu hakarak mós atrai investimentu privadu boot liu iha peskas no akuakultura enkuantu avansa estabelesimentu Institutu Nasionál Peskas no akuakultura hodi hametin peskiza, inovasaun, no kapasidade institusionál iha setór tomak. 

Programa “Página do Governo” promove hosi Gabinete Portavós Governu, ne’ebé lidera hosi Ministru Prezidénsia Konsellu Ministrus, Agio Pereira, programa ne’e prodús iha parseira ho RTTL no mídia nasionál sira, ho objetivu atu reforsa transparénsia governativa, prestasaun kontas no asesu sidadaun sira nian ba informasaun kona-ba desizaun no polítika públika prinsipál sira Ezekutivu nian.

Programa ne’e, konta ho Nélia Chaves nu’udar entrevistadora no ho Ika Moniz hanesan produtora ezekutiva, ne’ebé sai hanesan espasu ida ba diálogu institusionál, ne’ebé foka liu ba interese públiku. Programa “Página do Governo” ne’e grava hosi RTTL, no mós hetan apoiu tékniku hosi ekipa mídia Gabinete Primeiru-Ministru, Prezidénsia Konsellu Ministrus, no gabinete hosi membru Governu ne’ebé hetan entrevista.

Epizódiu ho Sekretáriu Estadu Terras no Propriedades sei fó-sai iha tempu badak iha RTTL no mídia sosiál sira.

Programa hotu-hotu ne’ebé tranzmite ona disponivel iha kanál YouTube @PCMPAGINADOGOVERNOTIMORLESTE