Primeiru-Ministru Timor-Leste, Kay Rala Xanana Gusmão, iha sesta-feira,loron 20 fulan Maiu 2011, hafoin hola parte tiha iha serimónia hasa’e bandeira iha komemorasaun Restaurasaun Independénsia Timor-Leste ba dasiak, simu iha ninia servisu fatin Palásiu Governu, Dili, vizita hosi Primeiru-Ministru Guiné-Bissau, Carlos Gomes Júnior. Vizita hosi Xefe Ezekutivu Guiné nian ne’e, atu fó hanoin ba malun no fahe esperiénsia ba malun hodi hametin liután relasaun Nasaun rua ne’e nian iha futuru.

“Guiné-Bissau, hanesan fonte inspirasaun mai  ita nia luta, hahú kedas hosi luta armada kontra kolonializmu Portugés to’o hetan nia independénsia nasionál. Durante invazaun Indonézia nian iha fulan Dezembru 1975, misaun diplomátika Guiné-Bissau nian iha Nova Iorke fó tulun tebes ba rezisténsia timor-oan sira nian hodi halo diplomasia iha korredór ONU nian, atu konvense desizaun ONU nian hodi kondena invazaun Indonézia nian mai ita nia rain. Nasaun rua ne’e iha nia istória pasadu no kulturál ne’ebé hanesan, ita nia unidade ne’e kesi ho lasu amizade ida ne’ebé metin, tanba ne’e iha ami nia hasoru malun ohin, hanesan oportunidade ida hodi fó hanoin ba malun no fahe esperiénsia ba malu, atu kontinua hametin relasaun entre Nasaun rua no Povu rua ne’e iha futuru”  hateten Primeiru-Ministru Timor-Leste,  Kay Xanana Gusmão.

Iha fatin hanesan, Primeiru-Ministru Guiné-Bissau, Carlos Gomes Júnior, hateten  “Timor-Leste ho Guiné-Bissau, uluk la’o iha dalan ne’ebé mak difisil tebetebes, ohin hetan ona pás no liberdade, iha oportunidade atu troka informasaun, nune’e mós daudaun ne’e Nasaun rua ne’e iha hela prosesu atu halo reforma setór defeza no seguransa nian. Iha tempu ne’ebé difisil, ami la’o hamutuk iha korredór ONU nian atu defende ukun rasik an Timor-Leste nian, agora ami iha ne’e atu hametin tan relasaun entre Nasaun no Povu hosi Nasaun rua ne’e nian”.