Governu hato’o laran-susar boot ba falesimentu Dra. Paula Pinto
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Loron 13 fulan-Jullu tinan 2026
Deklarasaun Kondolénsia
Governu hato’o laran-susar boot ba falesimentu Paula Pinto
Governu Repúblika Demokrátika Timor-Leste hato’o laran-susar boot ba falesimentu Dra Paula Pinto, defensora kleur ba kauza Timor nian no amiga dedikada Timor-Leste nian, ne’ebé ohin hakotu iis iha Díli.
Durante dékada balun, Dra Paula Pinto servisu ho kompromisu no diskrisaun estraordináriu hodi defende direitu povu Timor ba autodeterminasaun no independénsia. Husi dékada 1970 nia rohan, nia halo parte iha frente esterna Rezisténsia, kontribui mobiliza solidariedade internasionál hodi apoia Timor-Leste.
Iha tinan 1999, nia asumi knaar ida ne’ebé partikularmente importante nu’udar membru husi ekipa ne’ebé estabelese gabinete apoiu Kay Rala Xanana Gusmão, iha momentu ne’ebá Prezidente Konsellu Nasionál Rezisténsia Timorense, enkuantu nia dadur hela iha Prizaun Salemba iha Jakarta. Nia atuasaun folin-laek iha momentu desisivu ida iha istória nasaun nian.
Hafoin restaurasaun independénsia, Dra Paula Pinto kontinua koloka nia esperiénsia no dedikasaun ba servisu Estadu Timor nian, integra iha Gabinete Prezidente Repúblika iha inísiu mandatu Prezidente Kay Rala Xanana Gusmão. Tuirmai nia mantein ligasaun ne’ebé forte ho Timor-Leste, hodi kontinua nia servisu liuhusi tradusaun, prezervasaun no promosaun memória istórika no apoiu ba inisiativa oioin ho importánsia nasionál, hatudu nafatin dedikasaun esepsionál, modésta no espíritu servisu ne’ebé kle’an.
Iha tempu lutu ida-ne’e, Governu fó omenajen ba nia ezemplu solidariedade, korajen no kompromisu ba Timor-Leste no rekoñese katak nia kontribuisaun sei eskreve permanente iha istória luta ba libertasaun nasionál no konstrusaun Estadu Timor-Leste.
Governu hato’o sentidu kondolénsia kle’an ba Dr. Roque Rodrigues, ba Dra Paula Pinto nia família no belun sira no ba sira hotu ne’ebé fahe ho nia ideál Timor-Leste ida ne’ebé livre no soberanu.
Atu nia deskansa ho paz.
