Ohin, loron 10 fulan-jullu tinan 2026, iha Palásiu Governu, Dili, Ministru Prezidénsia Konsellu Ministrus, Agio Pereira, hasoru-malu ho Koordenadora Unidade Planeamentu Integradu (UPI) hosi Ministériu Planeamentu no Investimentu Estratéjiku, Epi Orleães no ninia ekipa, hodi prepara reuniaun interministeriál ba setór Kuadru Institusionál iha ámbitu elaborasaun Planu Médiu Prazu ba tinan 2027-2030, ne’ebé ajenda ona ba segunda-feira oinmai, loron 13 fulan-jullu. 

Reuniaun interministeriál ne’e sei hala’o iha ámbitu Komisaun Interministeriál ba Koordenasaun Dezenvolvimentu Institusionál, ne’ebé kria hosi Rezolusaun Governu n. 43/2024, loron 14 fulan-agostu, no prezide hosi Ministru Agio Pereira, nu’udar lider ba komisaun ida-ne’e, hamutuk ho Ministru Planeamentu no Investimentu Estratéjiku. Durante enkontru ba preparasaun ne’e, analiza ona pontu situasaun ba serbisu ne’ebé  Unidade Planeamentu Integradu no Prezidénsia Konsellu Ministrus hala’o, iha koordenasaun ho ekipas téknikas ministériu sira-nian ne’ebé halo parte iha setór ida-ne’e, nune’e mós ajenda ba reuniaun iha loron 13 fulan-jullu, ne’ebé sei permite atu armoniza kontributu no define orientasaun estratéjika sira ba Planu Médiu Prazu.

 Elaborasaun ba planu ida-ne’e halo hanesan kontinuasaun husi konkluzaun Relatóriu Monitorizasaun ba Progresu Planu Estratéjiku Dezenvolvimentu (PED) 2011–2030, ne’ebé aprezenta ba Konsellu Ministrus iha loron 4 fulan-marsu tinan 2026. Planu Médiu Prazu ne’e ho objetivu atu orienta faze finál husi implementasaun PED, liuhosi definisaun prioridades governu nian ba períodu husi 2027 to’o 2030.

Unidade Planeamentu Integradu téknikamente koordena preparasaun planu ne’e, ho partisipasaun hosi entidade governamentál oioin. Iha setór Kuadru Institusionál, serbisu hirak ne’e lidera hosi Ministru Agio Pereira, iha koordenasaun ho Ministériu Interiór, Ministériu Administrasaun Estatál, Ministériu Finansas, Ministériu Justisa, Ministériu Defeza, Ministériu Negósius Estranjeirus no Kooperasaun, no mós Komisaun Funsaun Públika.

Relatóriu Monitorizasaun ba Progresu PED 2011–2030 analiza ezekusaun meta ho prazu badak no médiu 199 ne’ebé distribui iha setór estratéjiku lima planu nian. Iha setór Kuadru Institusionál, husi meta 44 ne’ebé define ona, neen mak konklui ona, 27 hatudu progresu avansadu, no 11 hatudu progresu parsiál, la eziste meta ne’ebé laiha progresu ruma.