Edisaun ba dala 24 hosi programa “Página do Governo” sei aprezenta reflesaun importante ida kona-ba hametin kooperasaun institusionál entre Governu no Parlamentu Nasionál, hodi promove governasaun ne’ebé transparente liu, responsável liu, no efetivu liu iha Timor-Leste. Programa ne’e sei transmite iha Sesta-feira, loron 10 fulan-jullu tinan 2026, tuku 8 kalan iha Rádiu no Televizaun Timor-Leste (RTTL) nian no iha plataforma mídia sosiál sira.

Iha programa ne’e sei hetan partisipasaun hosi Vise-Ministru Asuntus Parlamentáres, Adérito Hugo da Costa, ne’ebé sei fahe ninia perspetiva kona-ba nia kna’ar hodi hametin koordenasaun entre Ezekutivu no Parlamentu Nasionál. Entrevista ne’e mós sei ko’alia kona-ba tema prioritáriu sira, inklui ajenda lejislativa, transparénsia públika, reforma institusionál sira, kompromisu sira Timor-Leste nian hafoin nia adezaun ba Organizasaun Mundiál Komérsiu (WTO) no Asosiasaun Nasaun Sudeste Aziátiku nian (ASEAN), nune’e mós esforsu husi Governu nian hodi hametin administrasaun públika no promove partisipasaun sidadaun sira nian.

Entrevista ne’e esplora liután oinsá Vise-Ministru Asuntus Parlamentáres, ho apoiu hosi Gabinete Asuntu Parlamentár, hanesan unidade téknika espesializada husi Prezidénsia Konsellu Ministrus, asegura koordenasaun entre Ezekutivu no Parlamentu Nasionál. Vise-Ministru esplika mós kona-ba funsionamentu atividade parlamentár durante semana tomak, husi sesaun plenária no serbisu komisaun espesializada sira-nian to’o vizita ba sira-nia munisipiu eleitorál, destaka mós knaar ninia gabinete nian iha koordenasaun inisiativa lejislativa sira, monitoriza prosesu aprovasaun lei nian, no fó apoiu ba membru Governu sira durante audiénsia parlamentár.

Programa ne’e sei transmite iha Sesta-feira, loron 10 fulan-jullu tinan 2026, tuku 8 kalan iha Rádiu no Televizaun Timor-Leste (RTTL) nian no iha plataforma mídia sosiál sira. Keta lakon oportunidade ida ne’e atu hatene liután kona-ba Governu nia esforsu atu hametin instituisaun demokrátiku sira no promove governasaun públika ne’ebé transparente, efisiente, no partisipativu ba beibeik iha Timor-Leste.

Programa “Página do Governo” promove hosi Gabinete Portavós Governu, ne’ebé lidera hosi Ministru Prezidénsia Konsellu Ministrus, Agio Pereira, programa ne’e prodús iha parseria ho RTTL no mídia nasionál sira, ho objetivu atu reforsa transparénsia governativa, prestasaun kontas no asesu sidadaun sira nian ba informasaun kona-ba desizaun no polítika públika prinsipál Ezekutivu nian.

Programa ne’e, konta ho Nélia Chaves nu’udar entrevistadora no ho Ika Moniz hanesan produtora ezekutiva, ne’ebé sai hanesan espasu ida ba diálogu institusionál, ne’ebé foka liu ba interese públiku. Programa “Página do Governo” ne’e grava hosi RTTL, no mós hetan apoiu tékniku hosi ekipa mídia Gabinete Primeiru-Ministru, Prezidénsia Konsellu Ministrus, no gabinete hosi membru Governu ne’ebé hetan entrevista.