IV GOVERNU KONSTITUSIONÁL

SEKRETARIA ESTADU KONSELLU MINISTRU

……………………………………………………………………………………………………………………………..

KOMUNIKADU BA IMPRENSA

Sorumutu Konsellu Ministru nian loron 18, fulan Maiu 2011

 

Konsellu Ministru hala’o Sorumutu, iha kuarta-feira ida ne’e, loron 18, fulan Maiu 2011, iha Sala Sorumutu Konsellu Ministru nian, iha Palásiu Governu, iha Díli, no aprova ona:

1. Dekretu-Lei ne’ebé aprova Rejime Jurídiku Administrasaun no Jestaun nian ba Ensinu Sekundáriu

Ministériu Edukasaun hetan ona aprovasaun ba nia  Dekretu-Lei kona-ba Rejime Jurídiku no Jestaun nian ba Sistema Ensinu Sekundáriu.

Dekretu-Lei ida ne’e regula sistema ensinu sekundáriu jerál no tékniku-vokasionál atu nune’e bele garante ninia jestaun integrada iha territóriu tomak no aumenta efisiénsia sistema nian, oferta ensinu no mobilidade alunu sira nian.

2. Dekretu ne’ebé prolonga tan mandatu Komisaun Eventuál ba Verifikasaun Dadus Primeiru Períodu nian hodi halo  Rejistu ba Kombatente Libertasaun Nasionál

Tanba haree ba difikuldade no kompleksidade kona-ba prosesu verifikasaun ba pedidu rejistu nian, mak prolonga tan mandatu Komisaun Eventuál ba Verifikasaun Dadus Primeiru Períodu nian to’o loron 25 fulan Novembru 2011 hodi halo rejistu ba Kombatente Libertasaun Nasionál sira.

Konsellu Ministru halo análize mós ba:

1. Imajen Institusionál Governu nian

Sekretaria Estadu Konsellu Ministru aprezenta imajen institusionál Governu nian ne’ebé prepara ona ba Ministériu no Sekretaria Estadu hotu-hotu. Objetivu hosi aprezentasaun ne’e atu uniformiza imajen no utiliza imajen ne’e iha dokumentu ofisiál sira atu nune’e bele impede utilizasaun ne’ebé ita la hakarak. Iha tiha hanoin kona-ba imajen institusionál ne’e atu implementa iha ministériu hotu-hotu husi utilizasaun to’o ba nia aplikasaun, liu husi envelope, karta, ofísiu no memorandu sira inklui mós tipu letra nian.

2. Programa Komemorasaun ba Loron Mundiál Labarik nian

Komisaun Nasionál ba Direitu sira Labarik nian, husi Ministériu Justisa, aprezenta ona ba Konsellu Ministru programa atu selebra Loron Mundiál ba Labarik, ne’ebé sei komemora iha loron 1 fulan Juñu oin mai.

Governu sei sentraliza komemorasaun hirak ne’e iha distritu Vikeke no ho tema “ Direitu ba Labarik sira nian sai nu’udar devér ita hotu nian”.

3. Dekretu-Lei kona-ba Alterasaun dahuluk ba Orgánika Sekretaria Estadu Juventude no Desportu nian

Sekretaria Estadu Juventude no Desportu aprezenta alterasaun dahuluk ba ninia Orgánika. Mosu alterasaun ida ne’e tanba presiza kontempla ezisténsia servisu nian ho kompeténsia ba iha área Auditoria Interna.

Nune’e, Konsellu Ministru diskute ona kona-ba figura no atribuisaun sira ba Inspetór-Jerál iha atividade Sekretaria Estadu ida ne’e nia laran.