Atu bele prepara di’ak liután orsamentu fiskál Tinan 2012, Ministériu Finansa organiza semináriu ida ba Diretór Jerál, Diretór Administrasaun Finansa sira husi Ministériu hotu-hotu no pontu fokál sira, iha salaun Konferénsia Ministériu Finansa, iha loron 09 fulan Maiu tinan 2012. Iha semináriu ida ne’e, fahe Livru Orsamentu Jerál Estadu (OJE) tinan 2011 nian  no Pakote Fiskál ba tinan 2012. Livru OJE ba tinan 2011, sei sirkula hamutuk ho Pakote Fiskál tinan 2012 no Portál foun Transparénsia nian, atu sai hanesan matadalan ba Ministériu ida-idak, hodi elobara planu orsamentál ba tinan oin mai, no hodi submete ba Diresaun Nasionál orsamentu iha fulan Juñu tinan ida ne’e.

Tuir Ministra Finansa, ida ne’e hanesan kontinuasaun husi semináriu ne’ebé hala’o tiha ona iha fulan Abril tinan 2011, hodi difini prioridade sira ba tinan 2012 inklui monitorizasaun ba Pakote Fiskál ba Ministériu idak-idak. Oras ne’e mós ho Portál Transparénsia, ezekusaun orsamentál, análize no monitorizasaun orsamentu ba divizaun ida-idak, tuir nia kategoria sira, sei fásil liu ba ministériu ida-idak atu hala’o nia servisu no, nune’e, sei asesível liu ba públiku sira hotu.

Ministériu Finansa fiar katak, aprezentasaun hirak ne’ebé hala’o iha semináriu, bele aumenta kapasidade no koñesimentu ba Diretór-Jerál no Diretór Finansa sira, kona-ba sistema ezekusaun orsamentál.

Francisco Soares, Diretór-Jerál Finansa Estadu nian, deklara katak, “karik Ministériu hotu-hotu halo tuir sistema ne’ebe estabelese tiha ona, sei iha mudansa liután no transparénsia iha ezekusaun orsamentál iha tinan ida ne’e no tinan oin mai”. Nia hato’o tan katak, semináriu hanesan pasu ida atu fó liután konfiansa ba Diretór Jerál sira kona-ba knar kontrolu ezekusaun orsamentál iha instituisaun ne’ebé mak pertense.

Iha mós eventu ida ne’ei, Dirétor Finansa RTTL, Júlio Manuel Correia, Diretór Finansa PNTL Lucas Tilman, rekoñese katak  Portál Transparénsia, asesu ba informasaun bele ajuda Instituisaun sira iha elaborasaun orsamentu. Benefisiu ida ne’ebé mak Diretór Finansa sira bele hetan husi Portál ida ne’e, mak sira konsege halo monitorizasaun no kontrolu diretamente ba dezenvolvimentu ezekusaun orsamentu iha sira nia instituisaun.

Iha okaziaun ida ne’e, Diretora Tezouru aproveita mós oportunidade hodi fó hatene ba partisipante sira, kona-ba progresu ezekusaun orsamentál.