Sekretaria Estadu Defeza, liu husi komisaun rekrutamentu ba forsa F-FDTL tinan 2011, iha loron 13 fulan Maiu 2011, iha Palásiu Governu, fó sai lista kandidatu sira ne’ebé mak liu ona selesaun tuir kritériu ne’ebé komisaun rasik estabelese.

“Komisaun anunsia lista ba kandidatu sira ne’ebé liu ona selesaun atu inkorpora iha F-FDTL, totál kandidatu ne’ebé selesionadu hamutuk  600, kompostu hosi, postu ofisiál 92, sarjentu 157 no prasa 351, entre totál ne’ebé iha, kandidatu feto hamutuk na’in 78 kompostu hosi postu ofisiál kandidatu na’in 6, sarjentu 24 no prasa  48”, hateten Prezidente Juri ba Rekrutamentu, João Corte-Real de Araújo.

Prezidente Juri no Diretór Jerál Sekretaria Estadu Defeza ne’e hatutan tan katak, “husu ba kandidatu sira ne’ebé naran iha lista ne’e, atu ba aprezenta an iha Estádiu Munisipál Dili, loron 30 fulan Maiu, iha, tuku 08.00 dadeer”.

Lista sira ne’e komisaun entrega ona mós ba Ministériu Administrasaun Estatál no Ordenamentu Territóriu ho Polisia Nasionál Timor-Leste atu públika mós iha distritu no sub-distritu sira.