Ministériu Finansa hala’o, iha loron 6 fulan Maiu iha ninia instalasaun sira, serimónia entrega sertifikadu formasaun iha Aprovizionamentu ba formandu na’in 38 husi funsionáriu públiku no membru F-FDTL, hahú husi nível 2 to’o ba nível 5.

Serimónia ne’e prezidi husi Vise-Ministru Finansa, Rui Manuel Hanjam, ho prezensa Diretór-Jerál Finansa nian, Francisco da Costa Soares, Diretór Aprovizionamentu, Manuel Monteitro, Diretór sira seluk husi Ministériu Finansa, Diretór nasionál no asesór internasionál sira.

Pakote formasaun ne’ebé hala’o ho apoiu finanseiru husi Banku Mundiál, tinan ne’e hahú iha Janeiru iha Baukau, no iha Fevereiru no Abril iha Díli, ho formandu hamutuk hotu ema na’in 106.

Tópiku formasaun ne’e sentraliza liu ba iha siklu aprovizionamentu, hanesan mós resesaun dokumentu, prosesu konkursu, avaliasaun, kontratasaun, jestaun no tema seluk ne’ebe relasiona ho Finansa Estadu nian ne’ebé inklui tesouraria, orsamentu, jestaun ativu no autoridade públika, nune’e mós hanesan reseita husi servisu Diresaun-Jerál ba Reseita no Alfándega.

Formadór sira ne’e mesak funsionáriu seniór husi Ministériu Finansa, asesór nasionál no internasionál sira. Objetivu formasaun ne’e atu hodi fortalese kapasidade ekipa administrasaun no jestaun aprovizionamentu ministériu sira nian atu hodi aumenta efisiénsia no efikásia jestaun kontratu iha kada ministériu no iha Governu tomak.