Iha loron 2 fulan- jullu, Ministru Defeza, Donaciano do Rosário Gomes asina Akordu Implementasaun ba Ospitál Amizade Timor-Leste–Xina, iha Ministériu Defeza iha Dili, ho Konselleiru Seksaun Ekonómika no Komersiál Embaixada Xina iha Timor-Leste. 

Konstrusaun ospitál ne’e hanesan rezultadu doasaun  hosi Governu Repúblika Populár Xina ba Estadu Timor-Leste, ho valór estimadu besik  dolar amerikanu millaun 20, iha  ámbitu kooperasaun entre nasaun rua ne’e.

Asinatura Akordu Implementasaun  ne’e nu’udar  faze finál hosi negosiasaun téknika no administrativa ne’ebé presiza hodi hahú ezekusaun projetu, no permite entidade ne’ebé responsavel ba jestaun projetu nian hodi avansa ho prosedimentu  konkursu iha faze konstrusaun.

Futuru Ospitál Amizade Timor-Leste–Xina sei harii besik iha Ministériu Defeza no Kuartél-Jenerál FALINTIL-Forsa Defeza Timor-Leste (F-FDTL), iha Dili. Projetu ne’e inklui ospitál jerál ida ho kapasidade kama 100, área maizumenus metru kuadradu 10.500, edifísiu prinsipál ida ho andár ualu, no mós edifísiu apoiu sira, ne’ebé kompleta ho teknolojia médika moderna no preparadu atu fornese servisu konsulta esterna, kuidadu emerjénsia, internamentu, imajiolojia, análizes klínikas no kuidadu intensivu.

Infraestrutura ne’e ho objetivu atu reforsa kapasidade nasionál iha prestasaun kuidadu saúde ba F-FDTL sira, sira-nia família, kombatente no veteranu sira, no membru Polísia Nasionál Timor-Leste no sira-nia família sira, no bele  mós apoia atendimentu ba populasaun ein-jerál, tuir misaun no kapasidade ospitál nian.

Iha sorumutu Konsellu Ministrus ne’ebé hala’o iha loron 1 fulan-jullu,  misaun téknika xineza ne’ebé responsavel ba serbisu preparatóriu sira ne’e aprezenta ba membrus Governu karakterístika prinsipál sira hosi projetu ne’e no ninia kalendáriu implementasaun, no permite atu esklarese aspetus téknikus no mós faze oioin ne’ebé prevee ona ba ninia ezekusaun.

Protokolu doasaun ba konstrusaun Ospitál Amizade Timor-Leste–Xina asina iha loron 21 fulan-agostu tinan 2025, durante komemorasaun aniversáriu FALINTIL ba dala 50, ne’ebé hala’o iha Tasi-Tolu, Dili. Asinatura Akordu Implementasaun nian, ne’ebé agora konkretiza ona ne’e sai hanesan  pasu tuirmai ba inísiu faze konstrusaun infraestrutura ida ne’e nian, ne’ebé dezenvolve iha ámbitu kooperasaun bilaterál entre Timor-Leste no Repúblika Populár Xina.